Penington ආයතනයේ විශ්ලේෂණයකට අනුව මත්ද්‍රව්‍ය හේතුවෙන් සිදුවන මරණ අඛණ්ඩව දසවන වසරටත් ඉහළ ගොස් තිබෙනවා.
වසර දහයක කාලයක් පුරා සෑම වසරකම මරණ 2,000 කට වඩා සිදුවී ඇති බවයි නව වාර්තාවේ දැක්වෙන්නේ.
පසුගිය වසරේ මරණ 2,272ක් වාර්තා වී ඇති අතර ඉන් හතරෙන් තුනකට වඩා වැඩි ප්‍රමාණයක් මත්ද්‍රව්‍ය අධි මාත්‍රාවෙන් ගැනීම නිසා සිදු වූ මරණ වනවා.
මෙම මරණ සංඛ්‍යාව මසකට 189 ක් පමණ වන අතර මත්ද්‍රව්‍ය ආශ්‍රිත මරණ බොහෝ විට හෘදයාබාධ සහ ප්‍රධාන ධමනි අවහිර වීම නිසා සිදු වී ඇති බවයි වාර්තා වන්නේ.
Penington ආයතනයේ ප්‍රධාන විධායක ජෝන් රයන් කියා සිටියේ බොහෝ මරණ වලට වඩාත් සුලභ මත්ද්‍රව්‍ය වර්ගය හෙරොයින් වන අතර එය සියලුම මරණ වලින් 43.9% ක් පමණ වන බවයි.
මෙම මරණ බොහොමයක් පෞද්ගලික නිවාස වල සිදුවී ඇති අතර ඉන් බොහොමයක් ප්‍රාදේශීය හා ග්‍රාමීය නගරවල නිවාස තුළදී සිදු වී තිබෙනවා.
පෙනින්ටන් ආයතනය වැඩිදුරටත් සදහන් කර සිටියේ මත්ද්‍රව්‍ය හේතුවෙන් සිදුවන මරණ වළක්වා ගත හැකි බවත්, ඒ සදහා රජයේ ආයතන වල අවධානය නිසි ලෙස යොමු කල යුතු බවත් ලෙසයි.
