ඔස්ට්‍රේලියාවේ Youth Allowance ලබන සිසුන් සංඛ්‍යාව සැලකිය යුතු ලෙස පහත වැටී ඇති බව වාර්තා වනවා.
සමාජ සේවා දෙපාර්තමේන්තුවේ සංඛ්‍යාලේඛනවලින් පෙන්නුම් කර ඇත්තේ පසුගිය වසර 20 තුළ Youth Allowance ගෙවීම් ලබන සිසුන් ගණන විශාල ප්‍රමාණයකින් අඩුවී ඇති බවයි.
අඩු ආදායම්ලාභී සහ ප්‍රාදේශීය සිසුන් විශ්ව විද්‍යාලවලට යාමෙන් හෝ අධ්‍යයන කටයුතු සම්පූර්ණ කිරීමෙන් වැළකී සිටින බවයි විශේෂඥයින් පවසන්නේ.
සමාජ සේවා දෙපාර්තමේන්තුවට අනුව, 2005 ජුනි මාසය වනවිට Youth Allowance ලබන සිසුන් සංඛ්‍යාව 275,000 ක් වූ අතර, මෙම වසරේ මැයි මාසයේදී එය 162,000 ට අඩු වී තිබෙනවා.
එහෙත් එම කාලය තුළ විශ්ව විද්‍යාලවලට යන සමස්ත සිසුන් සංඛ්‍යාවේ වැඩිවීමක් දක්නට ලැබෙන බවයි දෙපාර්තමේන්තුව පෙන්වා දෙන්නේ.
කෙසේවෙතත් මෙම වසරේ ෆෙඩරල් අයවැය මඟින් ඉදිරි ඇස්තමේන්තු වලට වඩා ශිෂ්‍ය ගෙවීම් සඳහා ඩොලර් මිලියන 500 කට ආසන්න මුදලක් අඩු වනු ඇති බවට මත පළ වී තිබෙනවා.
