තම ගමන් මළු පිළිබඳ අවධානයෙන් පසුවන්නැයි ඔස්ට්‍රේලියානු සංචාරකයින්ට අනතුරු අඟවා තිබෙනවා.
මෙල්බන් සිට බ්‍රිස්බේන් දක්වා ජෙට්ස්ටාර් [Jetstar] යානයකින් ගමන් කළ බ්‍රේඩි වොට්සන් (Brady Watson) නැමති පුද්ගලයෙකු අතපසුවීමකින් තම ගමන් මල්ල වෙනුවට වෙනත් අයෙකුගේ ගමන් මල්ලක් රැගෙන විත් තිබෙනවා.
නැවත බ්‍රිස්බේන් ගුවන්තොටුපොළට එය රැගෙන ගිය ද තම ගමන් මල්ල සොයාගැනීමට නොහැකිවූ බවයි ඔහු පවසන්නේ.
මේ වනවිට මාස 3 ක කාලයක් ගතවී ඇතත් ගුවන් තොටුපොළ සේවකයන් පවසා ඇත්තේ බෑගය පිළිබඳ කිසිවක් නොදන්නා බවයි.
ගමන් මල්ල පිළිබඳ Jetstar සමාගමෙන් තොරතුරු ලබා ගැනීම දිනෙන් දින අපහසු වී ඇති බව ද වොට්සන් පවසනවා.
ජෙට්ස්ටාර් සහ බ්‍රිස්බේන් ගුවන්තොටුපළ විශ්වාස කරන්නේ ඔහු අනෙක් මගියාගේ ගමන් මල්ල ආපසු රැගෙන ඒමට පෙර වොට්සන්ගේ ගමන් මල්ල ගුවන් තොටුපළෙන් සොරකම් කර ඇති බවයි.
කෙසේවෙතත් Jetstar ගුවන් සමාගම සඳහන් කර ඇත්තේ තම පාරිභෝගික සේවා කණ්ඩායම ඔහුට සහාය වීමට හැකි සෑම පියවරක්ම ගෙන ඇති බවයි.
මේ අතර CCTV කැමරා කිහිපයකින් වීඩියෝ පට පරීක්ෂා කළ ද ගමන් මල්ල රැගෙන ගිය පුද්ගලයා හඳුනාගැනීම අපහසු වී ඇති බව බ්‍රිස්බේන් ගුවන් තොටුපළ නිවේදනයක් නිකුත් කරමින් පවසා තිබෙනවා.
