බංගලාදේශය සමග පැවති දෙවන සහ අවසන් ටෙස්ට් තරගයෙන් ඉනිමක සහ ලකුණු 78 ක ජයක් ලබා ගැනීමට ශ්‍රී ලංකා කණ්ඩායම අද සමත් වුණා.
ඒ් අනුව ලෝක ටෙස්ට් ශූරතාවලියේ මුහුණදුන් පළමු තරගාවලිය 1 ට 0 ක් ලෙස ජය ගැනීමට ශ්‍රී ලංකා ක්‍රිකට් කණ්ඩායමට හැකිවුණා.
ඊයේ 3 වන දිනය නිමා වන විට සිය දෙවන ඉනිම සඳහා පන්දුවට පහර දෙමින් සිටි බංගලාදේශ කණ්ඩායම කඩුළු 6 ක් දැවී ලකුණු 115 ක් ලබා සිටියා.
අද තරගය ආරම්භ වී පැය භාගයක පමණ කාලයකදී බංගාදේශ කණ්ඩායමේ ඉතිරි කඩුළු සියල්ල ලකුණු 133 කදී දවා ගැනීමට ශ්‍රී ලංකා පන්දු යවන්නන් සමත් වුණා.
ශ්‍රී ලංකා කණ්ඩායම සිය පළමු ඉනිම සඳහා සියලු දෙනා දැවී ලකුණු 458 ක් ලබාගත් අතර එහිදී පැතුම් නිස්සංක ලකුණු 158 ක්, දිනේෂ් චන්දිමාල් ලකුණු 93 ක් සහ කුසල් මෙන්ඩිස් ලකුණු 84 ක් ලබා ගත්තා.
බංගලාදේශ කණ්ඩායම සිය පළමු ඉනිම සඳහා ලකුණු 247 ක් රැස් කළා.
තරගයේ වීරයා ලෙස පැතුම් නිස්සංක නම් කෙරුණු අතර ශ්‍රී ලංකාව සහ බංගලාදේශය අතර පැවැත්වූ තරග දෙකකින් සමන්විත ටෙස්ට් තරගාවලියේ වීරයා වූයේ ද පැතුම් නිස්සංකයි.
