ඉරානයේ න්‍යෂ්ටික සහ බැලැස්ටික් මිසයිල වැඩසටහන ජාත්‍යන්තර සාමයට සහ ආරක්ෂාවට තර්ජනයක් බව ෆෙඩරල් රාජ්‍ය ප්‍රකාශකයෙකු පවසනවා.
එක්සත් ජනපදය ඉරානයේ න්‍යෂ්ටික බලාගාරවලට ප්‍රහාර එල්ල කළ බවට ජනාධිපති ට්‍රම්ප් තහවුරු කිරීමෙන් පසුවයි රාජ්‍ය ප්‍රකාශකයෙකු මේ බව පවසා ඇත්තේ.
සාමයට කාලය එළැඹ ඇති බවට එක්සත් ජනපද ජනාධිපති ට්‍රම්ප් කළ ප්‍රකාශය පිළිබඳ අදහස් දක්වමින් රාජ්‍ය ප්‍රකාශකයා කියාසිටියේ මැදපෙරදිග කලාපයේ ආරක්ෂක තත්වය ඉතා අස්ථාවර බවයි.
ඉරානයේ සහ ඊශ්‍රායලයේ සිටින ඔස්ට්‍රේලියානුවන්ගෙන් ඔස්ට්‍රේලියා රජය ඉල්ලා සිටියේ ආරක්ෂක තොරතුරු නිරීක්ෂණය කරමින් ඒවාට අනුව ක්‍රියාකරන ලෙසයි.
එමෙන්ම දෙරටින්ම ඔස්ට්‍රේලියානුවන්ට පිටත්වීමට අවශ්‍ය සහය ලබාදීමට විදේශ කටයුතු සහ වෙළද දෙපාර්තමේන්තුව ලියාපදිංචි ඔස්ට්‍රේලියානුවන් සමග මේවනවිටත් සෘජු සන්නිවේදන සිදුකරමින් සිටින බවද ප්‍රකාශකයා අවධාරණය කළා.
මේ අතර ඊශ්‍රායල අගමැති බෙන්ජමින් නෙතන්යාහු වීඩියෝවක් පළකරමින් පවසා ඇත්තේ ඊශ්‍රායලයේ සියලුම පුරවැසියන් වෙනුවෙන් සහ සමස්ත යුදෙව් ලෝකය වෙනුවෙන්, ඇමරිකා ජනාධිපතිවරයාට සිය ස්තූතිය හදවතින්ම පිරිනමන බවයි.
