ජීවන වියදම් වැඩිවීම වික්ටෝරියා ප්‍රාන්තයේ අපරාධ සංඛ්‍යාව වැඩි වීමට හේතු වන බව වික්ටෝරියා පොලිසිය පවසනවා
තරුණ ප්‍රචණ්ඩත්වයද වාර්තාගත මට්ටමකින් ඉහළ ගොස් ඇති බවයි පොලිසිය වැඩිදුරටත් සදහන් කර සිටියේ.
වික්ටෝරියා අපරාධ සංඛ්‍යාලේඛන ඒජන්සිය විසින් වාර්තා වූ ඉහළම අපරාධ සංඛ්‍යාව ලෙස සදහන් කරන්නේ මෝටර් රථ සොරකම් කිරීමයි.
තවද පවුල් ප්‍රචණ්ඩත්වය සම්බන්ධ අපරාධ 10%කින් ඉහළ ගොස් වාර්තාගත මට්ටමකට ළඟා වී ඇති බව වාර්තා වල දැක්වෙනවා.
වික්ටෝරියා පොලිස් නිලධාරි ඩේවිඩ් ක්ලේටන් සදහන් කලේ ප්‍රාන්තයේ සමස්ථ අපරාධ සංඛ්‍යාව 18%කට වඩා වැඩි වී ඇති බවයි.
වයස අවුරුදු 10–17 ත් අතර තරුණයන් මුළු අපරාධකරුවන්ගෙන් 13%ක් පමණ වන අතර ප්‍රචණ්ඩත්වය සහ සොරකම් වැනි අපරාධ වැඩියෙන්ම සිදුකරන්නෙද ඔවුන් බවයි වාර්තා වන්නේ.
රථ වාහන සොරකම් 47.1%ක් සහ භාණ්ඩ සොරකම් 38.6%ක් දක්වා ඉහළ ගොස් ඇති අතර ජීවන වියදම සමඟ පොරබදමින් සිටින පවුල් වෙළඳසැල් ඉලක්ක කරගනිමින් අපරාධ සිදුකරන බව අපරාධ සංඛ්‍යාලේඛන වාර්තාවේ සදහන් වනවා.
