ඔස්ට්‍රේලියාවේ කායවර්ධන ක්‍රීඩිකාවන් ශරීර වර්ධක ඖෂධ [steroids] භාවිතා කිරීම ඉහළ ගොස් ඇති බව හෙළි වී තිබෙනවා.
ශරීර වර්ධක ඖෂධ පිරිමි කායවර්ධන ක්‍රීඩකයන් මාංශපේෂි වර්ධනය සදහා භාවිත කරන අතර මේ වනවිට කාන්තාවන් අතර ද එය ජනප්‍රියව පවතිනවා.
ග්‍රිෆිත් [Griffith] විශ්ව විද්‍යාලය සිදුකළ අධ්‍යයනයකදී හෙළි වී ඇත්තේ සාමාන්‍ය කාන්තාවන්ට වඩා කායවර්ධන ක්‍රීඩිකාවන් steroids භාවිත කිරීම 12 ගුණයකින් වැඩි වී ඇති බවයි.
අධ්‍යයනයට අනුව ලොව පුරා කාන්තාවන්ගෙන් 4% ක් steroids භාවිතා කරන අතර 2014 වසරේදී එය වාර්තා වී ඇත්තේ 1.4% ක් ලෙසයි.
වෛද්‍ය වට්ටෝරුවකින් තොරව anabolic steroids තබා ගැනීම නීතිවිරෝධී වනවා.
ග්‍රිෆිත් [Griffith] විශ්ව විද්‍යාලයේ ආචාර්ය ටිම් පියට්කොව්ස්කි [Tim Piatkowski] පවසන්නේ කාන්තාවන් steroids භාවිතා කිරීමෙන් දීර්ඝකාලීන හානිකර ප්‍රතිවිපාක ඇති විය හැකි බවයි.
anabolic steroids මගින් ප්‍රධාන වශයෙන් පිරිමි ලිංගික හෝමෝනවලට බලපෑම් ඇති කරනු ලබනවා.
එවැනි ඖෂධ අනිසි භාවිතයෙන් හෘදයාබාධ, ආඝාතය [stroke] සහ අක්මා හානි වීමේ අවදානම පවතින බවයි වෛද්‍යවරුන් පෙන්වා දෙන්නේ.
ඔස්ට්‍රේලියාවේ ප්‍රාන්ත අනුව මෙම ඖෂධ සම්බන්ධ නීති වෙනස් වනවා.
Queensland හි මෙම steroids, Schedule 1 ඖෂධයක් ලෙස වර්ගීකරණය කර ඇති අතර, වට්ටෝරුවකින් තොරව එය තබා ගැනීම සඳහා අවුරුදු 25 ක් දක්වා සිර දඬුවම් නියම කරනු ලබනවා.
Victoria හි ඒ සඳහා ලබාදෙන්නේ වසරක සිර දඬුවමක් පමණයි.
