ඊශ්‍රායලය ඉරානයේ ටෙහෙරාන් අගනුවරට ප්‍රහාර එල්ල කරමින් සිටිනවා.
අගනුවර පුරා පිපිරීම් ගණනාවක් සිදුවී ඇති අතර න්‍යෂ්ටික සහ හමුදා ස්ථාන ඉලක්ක කරගෙන ප්‍රහාර එල්ල වන බවයි වාර්තා වන්නේ.
ටෙහෙරානයේ වේගයෙන් ඉදිරියට යන න්‍යෂ්ටික වැඩසටහන් අතරතුරයි මෙම ප්‍රහාරය එල්ල වී ඇත්තේ.
මුලින්ම එල්ල කළ ප්‍රහාරවලදී ඉරානයේ ඉහළම හමුදා නායකයින් මෙන්ම ජ්‍යෙෂ්ඨ න්‍යෂ්ටික විද්‍යාඥයින් ද ඉලක්ක කර ගෙන ඊශ්‍රායලය ප්‍රහාර දියත්කර තිබෙනවා.
ඒ හේතුවෙන් ඇතැම් ජ්‍යෙෂ්ඨ ඉරාන නිලධාරීන් “රහස් ස්ථානවලට” මාරු කර ඇති බවයි එරට මාධ්‍ය වාර්තා පවසන්නේ.
ඊශ්‍රායලයේ ප්‍රහාරයට “තීරණාත්මක” ප්‍රතිචාරයක් ලබා දෙන බව ඉරානයේ රාජ්‍ය ප්‍රවෘත්ති ඒජන්සිය නිර්නාමික නිලධාරියෙකු උපුටා දක්වමින් පැවසුවා.
මේ අතර ඉරානය වසර ගණනාවක් තිස්සේ සිදුකරනු ලබන න්‍යෂ්ටික අවි තැනීමට ඉඩ නොදෙන බවටයි මීට පෙර ඊශ්‍රායලය අනතුරු අඟවා ඇත්තේ.
ඊශ්‍රායල අගමැති බෙන්ජමින් නෙතන්යාහු යූ ටියුබ් හි කළ දේශනයකදී කියා සිටියේ, “ඊශ්‍රායලයේ පැවැත්මට ඇති ඉරාන තර්ජනයට මිලිටරි මෙහෙයුමක් දියත් කළ බවයි.
ප්‍රහාර අඛන්ඩව එල්ල කරන බවත් අගමැතිවරයා එහිදී පවසා තිබෙනවා.
