ඩොලර් මිලියන 22 ක පවර්බෝල් ටිකට් පතක් දිනාගත් තරුණ ඔස්ට්‍රේලියානුවෙකුගේ ජීවිතය ඛේදවාචකයකින් අවසන්වීමේ පුවතක් මාධ්‍ය වාර්තාවල දැක්වෙනවා.
මීට වසර 5 කට පෙර 22 හැවිරිදි ජලනල කාර්මිකයෙකු වූ ජෝෂුවා වින්ස්ලට්ට මෙම දිනුම ලැබෙන අවස්ථාවේ ඔහුගේ බැංකු ගිණුමේ ඉතිරිව තිබුණේ ඩොලර් 19 ක් පමණයි.
ඔහුට තිබූ දුර්ලභ රෝග තත්වයක් හේතුවෙන් කුඩා කාලය පුරාම ඔහු නොයෙකුත් හිරිහැර මධ්‍යයේ වැඩුණු දරුවෙකු වන නමුත් මෙම ජයග්‍රහණය ඔහුට නව ජීවිතයක ආරම්භයක් වී ඇති බව සඳහන්.
එහෙත් මිතුරන් පවසන්නේ ලොතරැයි ජයග්‍රහණයෙන් පසු ඔහු ඉක්මනින්ම මත්ද්‍රව්‍යවලට ඇබ්බැහි වූ ජීවන රටාවකට ඇද වැටුණු බවයි.
2020 දී පොලිසිය ඔහුගේ ඇඩිලේඩ් නිවස වැටලීමෙන් කොකේන්, ගිනි අවියක් සහ පතොරම් ද අත්අඩංගුවට ගෙන තිබුණා.
මත්ද්‍රව්‍ය සහ ආයුධ චෝදනා සම්බන්ධයෙන් ඔහු වරදකරු වූ අතර යහපත් හැසිරීම් හේතුවෙන් අත්හිටවූ සිර දඬුවමක් නියම කර තිබෙනවා.
දඬුවම් නියම කිරීමේදී, විනිසුරුවරයා හදිසි ධනයේ බලපෑම් පෙන්වා දුන් අතර වින්ස්ලට් විනෝද වීම හැර වෙනත් කිසිවක් කිරීමට එම මුදල් යොදවා නොමැති බවයි එහිදී කියාසිටියේ.
වින්ස්ලට්ගේ මිතුරන් බොහෝ දෙනෙකු සිතූ පරිදි ඔහු 2022 අගභාගයේදී අධික මත්ද්‍රව්‍ය භාවිතය හා සම්බන්ධ සෞඛ්‍ය සංකූලතා හේතුවෙන් ඔහුගේ නිවස තුළදීම ජීවිතක්ෂයට පත්වුණා.
