හොස්කින් දූපත අසළදී ගිලෙමින් තිබූ බෝට්ටුවක සිටි පුද්ගලයින් සිව් දෙනෙකු බේරාගෙන තිබෙනවා.
ඔස්ට්‍රේලියානු සමුද්‍රීය ආරක්ෂක අංශ සදහන් කලේ හොස්කින් දූපත අසළ බෝට්ටුවක් ගිලී යන බවට හදිසි සංඥා යන්ත්‍රයකින් පණිවිඩයක් ලැබුනු බවයි.
මෙම බෝට්ටුව ග්ලැඩ්ස්ටන් ප්‍රදේශයේ උතුරු-නැගෙනහිර දිශාවට කිලෝමීටර් 55 ක් පමණ දුරින් තිබියදී ආරක්ෂක අංශ විසින් සොයාගෙන තිබෙනවා.
LifeFlight ගුවන් ආරක්ෂක සේවයේ නියෝජිතයෙකු පවසන්නේ මෙම පුද්ගලයින් සිව් දෙනා දින දෙකකට පෙර මසුන් ඇල්ලීමට ගොස් දූපතේ නවාතැන් ගෙන ඇති බවයි.
නැවත පැමිණෙමින් සිටියදී කාලගුණය අයහපත් වූ නිසා ඔවුන්ගේ බෝට්ටුව ජලයෙන් පිරී ගිලීමට පටන් ගෙන තිබෙනවා.
සිදුවීමෙන් කිසිවෙකුත් තුවාල ලබා නොමැති අතර මුහුදු යන විට හදිසි සංඥා යන්ත්‍ර රැගෙන යාමේ වැදගත්කම ආරක්ෂක අංශ පෙන්වා දුන්නා.
