ඉතිහාස‌යේ පළමු වරට IPL කුසලානය දිනා ගැනීමට රෝයල් චැලෙන්ජර්ස් බැංගලෝර් කණ්ඩායම ඊයේ සමත් වුනා.
ඒ රෝයල් චැලෙන්ජර්ස් බැංගලූරු හා පංජාබ් කිංග්ස් කණ්ඩායම අතර ඊයේ රාත්‍රියේ පැවති අවසන් තරගයෙන් පසුවයි.
ඒ අනූව වඩාත් තරගකාරී මෙන්ම ධනවත්ම ලීග් ක්‍රිකට් තරග මාලාව වන, ඉන්දියන් ප්‍රීමියර් ලීග් මෙම වසරේ තරගාවලිය ඊයේ රාත්‍රියේදී නිමාවට පත් වුනා.
අවසාන මහා තරගයේ කාසිය වාසිය හිමිකර ගත් පංජාබ් කිංග්ස් නායක ශ්‍රීයර්ස් අයියර් පළමුව පන්දු යැවීමට තීරණය කලා.
ඒ අනූව පන්දුවට පහරදුන් චැලෙන්ජර්ස් බැංගලූරු පිල මෙහිදී සිය පන්දු වාර 20 තුළ කඩුළු 9කට ලකුණු 190 ක තරගකාරී ලකුණු පුවරුවක් නිර්මාණය කිරීමට සමත්වුනා.
එහිදී රෝයල් චැලෙන්ජර්ස් බැංගලූරු පිලේ ඉහළම ලකුණු ලාභියා වූයේ සුපිරි ඉන්දීය පිතිකරු විරාට් කෝලි.
ඔහු පන්දු 35කදී ලකුණු 43 ක් ලබා ගැනීමට සමත්වුනා.
පංජාබ් කිංග්ස් කණ්ඩායමට නියමිත පන්දු වාර 20 අවසානයේ පිතිකරුවන් 7 දෙනෙකු දැවී ලබා ගත හැකි වූයේ ලකුණු 184 ක් පමණයි.
