ගුවන් මගීන්ට ශ්‍රී ලංකාවට පැමිණීම වළක්වමින් පණවා තිබූ නියමයන් ලබන ජූනි පළමුවනදා සිට ඉවත් කිරීමට ශ්‍රී ලංකා රජය තීරණය කර තිබෙනවා.
කෙසේවෙතත් ගතවූ දින 14 තුළදී ඉන්දියාවේ සිට ඇත්නම් එවැනි මගීන්ට රටට පැමිණිම අත්හිටුවමින් පණවා ඇති නියෝග නැවත දැනුම් දෙන තුරු බලාත්මක බවයි ශ්‍රී ලංකා සිවිල් ගුවන් සේවා අධිකාරිය නිවේදනය කලේ.
එමෙන්ම එක් ගුවන් යානයකින් එක් වරකදී රටට පැමිණිය හැකි පුද්ගලයන් සංඛ්‍යාව 75 නොඉක්මවිය යුතු වනවා.
පසුගිය මැයි 11 වනදා සිට බලාත්මක වන පරිදි සෞඛ්‍ය සේවා අධ්‍යක්ෂ ජනරාල්වරයා විසින් නිකුත් කර ඇති මාර්ගෝපදේශ අනුව රටට පැමිණෙන ඕනෑම අයෙකු දින 14 ක් නියමිත පරිදි නිරෝධායනය විය යුතුයි.
පූර්ණ එන්නත්කරණයට ලක්ව සිටියද එය අදාළ වන්නේ නැහැ.
ශ්‍රී ලාංකික පුරවැසියන් හෝ ද්විත්ව පුරවැසිලාභීන් රටට පැමිණීමේදී පූර්ව අනුමැතියක් අවශ්‍ය වන්නේ නැහැ.
එහෙත් සියලු විදේශිකයන් – මුහුදු ආරක්ෂකයන් – ව්‍යාපාරිකයන් ඇතුලු සෑම අයෙකුම රටට පැමිණිමට පෙර විදේශ කටයුතු අමාත්‍යංශයේ අවසරය ලබාගත යුතු බවයි සිවිල් ගුවන් සේවා අධිකාරිය නිවේදනය කලේ.
ඔවුන් විසින් සෘණාත්මත පී සී ආර් වාර්තාවක් ඉදිරිපත් කිරීම ඇතුලු සෞඛ්‍ය මාර්ගෝපදේශ නිසි පරිදි අනුගමනය කිරීමද අනිවාර්ය වනු ඇති.
