26 වන ආසියානු මලල ක්‍රීඩා ශූරතාවලියේදී ශ්‍රී ලංකාවේ හෙල්ල විසිකිරීමේ ක්‍රීඩකයින් වන සුමේධ රණසිංහ සහ රුමේධ තරංග පිරිමි හෙල්ල විසිකිරීමේ අවසන් තරගයට සුදුසුකම් ලබා තිබෙනවා.
ඒ පෙරේදා දකුණු කොරියාවේ ගුමි හි පැවති තරඟාවලියේදීයි.
රුමේධ තරංග මීටර් 83.71 ක ආකර්ෂණීය විසි කිරීමක් වාර්තා කළා.
ඔලිම්පික් ක්‍රීඩකයෙකු සහ ජාතික වාර්තා හිමි සුමේධ රණසිංහ මීටර් 81.33 ක් වාර්තා කරමින් ඉහළම අවසන් තරඟකරුවන් 12 දෙනා අතරට පැමිණියා.
ඔලිම්පික් රන් පදක්කම්ලාභී පකිස්තානයේ අර්ෂාඩ් නදීම්, මීටර් 86.34 ක දුරක් වාර්තා කරමින් සුදුසුකම් ලැබීමේ තරඟාවලියේ පෙරමුණ ගෙන සිටිනවා.
තරඟාවලියේ ඉහළම හෙල්ල විසි කරන්නන් සිව්දෙනා වූයේ අර්ෂාඩ් නදීම් (මීටර් 86.34), රුමේෂ් තරංග (මීටර් 83.71), ජපානයේ යුටෝ සකියාමා (මීටර් 81.36) සහ සුමේධ රණසිංහ (මීටර් 81.33) යි.
මේ අතර ශ්‍රී ලංකාවේ පිරිමි මීටර් 4×100 සහය දිවීමේ කණ්ඩායමට යෂ්ටිය හුවමාරුව වැරදීමකින් පසු, තරඟය අවසන් කිරීමට ඔවුන්ට නොහැකි වුණා.
එමෙන්ම පාදයේ ආබාධයක් හේතුවෙන් මීටර් 200 ඉසව්වෙන් කාලිංග කුමාරගේට අවසන් පූර්ව වටයෙන් ඉවත් වීමට සිදු වූ අතර, එම ඉසව්වේ ඔහුගේ පදක්කම් බලාපොරොත්තුව ද බිඳවැටුණා.
