හිතුමතේට විටමින් වැනි ඖෂධ ගැනීම අනතුරුදායක බව ඔස්ට්‍රේලියා සෞඛ්‍ය අංශ පවසනවා.
ඕස්ට්‍රේලියාවේ මෙල්බන්හි පදිංචි 33 හැවිරිදි ඩොමිනික් නූනන්-ඕ’කීෆ්, 2023 වසරේදී ශරීර සෞඛ්‍යයට හිතකර යැයි සිතා විටමින් ඩී, විටමින් සී සහ මැග්නීසියම් කැප්සියුල දිනපතා ගැනීම සිදුකර තිබෙනවා.
මැග්නීසියම් පෙතිවල නිර්දේශිත මාත්‍රාවට වඩා සැලකිය යුතු ලෙස විටමින් B6 මාත්‍රාව අඩංගු වූ බැවින් එහි ප්‍රතිඵලයක් ලෙස මාස තුනක් ඇතුළත ඔහුට විවිධ රෝග ලක්ෂණ මතුවී ඇති බවයි වාර්තා වන්නේ.
ඔක්කාරය, කරකැවිල්ල සහ ඇවිදීමේ අපහසුතා ඇති වීමට පටන් ගෙන තිබුණා.
මේ වනවිට ඔහුට ස්නායු රෝගයක්ද පවතිනවා.
අත් සහ පාදවල ස්නායු හානිවීම හේතුවෙන් හිරිවැටීම, සහ වේදනාව වැනි රෝග ලක්ෂණ පවතින බවයි වෛද්‍යවරුන්ගේ මතය වන්නේ.
විටමින් B6 යනු මොළයේ ක්‍රියාකාරිත්වය සහ හෝමෝන සමතුලිතතාවය වැනි ක්‍රියාකාරකම් රාශියකට වැදගත් වන අත්‍යවශ්‍ය පෝෂ්‍ය පදාර්ථයක් වන අතර අපගේ ආහාර වේලෙන් ප්‍රමාණවත් ප්‍රමාණයක් ඉන් ලැබෙනු ඇති.
මස්, කිරි නිෂ්පාදන සහ බිත්තර මෙන්ම නිවිති, කෙසෙල් සහ අර්තාපල් වලද විටමින් B6 දක්නට ලැබෙනවා.
එමෙන්ම බර අඩු කර ගැනීමේ ෂේක්ස්, ශක්තිජනක පාන වර්ග වල ඉහළ මට්ටමේ B6 අඩංගු විය හැකි අතර එමඟින් ද මෙම ගැටළුව ඇති විය හැකි බවයි විද්‍යාඥවරියක් පවසා ඇත්තේ.
කෙසේවෙතත් විටමින් වර්ග ලබාගැනීමේදී වුවද වෛද්‍යවරයෙකුගේ උපදෙස් මත ලබාගන්නා ලෙස ඇය ජනතාවට දැනුම්දෙනවා.
