දකුණු මෙල්බන් හි සිදුවූ වෙඩි තැබීමකින් කාන්තාවක් මිය ගොස් පිරිමින් තිදෙනෙකු රෝහල් ගත කර තිබෙනවා.
වික්ටෝරියා පොලිසිය පවසන්නේ පාර්ක් වීදිය ප්‍රදේශයේදී පොලිස් නිලධාරියෙකු සිය තුවක්කුවෙන් හතර වතාවක් සිදුකළ වෙඩි තැබීමකින් 34 හැවිරිදි කාන්තා රියදුරෙකු එම ස්ථානයේදීම මිය ගිය බවයි.
පොලිස් නිලධාරියා දෙසට මෝටර් රථය ධාවනය කිරීම හේතුවෙන් වෙඩි තැබීම සිදුකළ බව පොලීසිය කියාසිටියා.
එහිදී මෝටර් රථය තුළ සිටි 26 හැවිරිදි පිරිමි පුද්ගලයෙක්ගේ කකුලට වෙඩි වැදීමෙන් තුවාල සිදුව ඇති බව සඳහන්.
පොලීසියට අවශ්‍යව සිටි පිහියක් අතැති පුද්ගලයෙකුද තුවාල ලබා රෝහල්කර තිබෙනවා.
පිරිමි දෙදෙනාටම ජීවිත තර්ජනාත්මක නොවන තුවාල සිදු වී ඇති අතර වාහනයක ගැටුණු ජ්‍යෙෂ්ඨ කොස්තාපල්වරයාද තුවාල ලබා ඇති බවයි වාර්තා වන්නේ.
දකුණු මෙට්‍රෝ කලාපයේ වැඩබලන සහකාර කොමසාරිස් Therese Fitzgerald අද වාර්තාකරුවන්ට පැවසුවේ නිලධාරියාගේ කකුල් වලට තුවාල සිදුවී ඇති බව හා සිද්ධියේදී ඔහු මෝටර් රථය සහ බිත්තියක් අතර සිරවී ඇති බවයි.
අද සවස 5 ට පමණ සෙසිල් වීදියේ පිරිමි පුද්ගලයෙකු පිහියක් අතැතිව සිටින බවට ලද පැමිණිල්ලකට අනුව පොලීසිය එම ස්ථානයට ගොස් තිබෙනවා.
නිලධාරීන් දෙදෙනෙකු එම පුද්ගලයා අත්අඩංගුවට ගනිමින් සිටියදී, සොරකම් කරන ලද දකුණු ඕස්ට්‍රේලියානු අංක තහඩු සහිත ෆෝඩ් ප්‍රදේශයේ පුද්ගලයෙකු ජ්‍යෙෂ්ඨ කොස්තාපල්වරයා දෙසට ධාවනය කර ඇති බවයි වාර්තා වන්නේ.
පසුව නිලධාරියා විසින් ඔහුට වෙඩි තබා ඇති බව මාධ්‍ය හමුවේදී වැඩබලන සහකාර කොමසාරිස්වරයා සඳහන්කළා.
