2022 වසරේ ආරම්භ වූ යුද්ධයෙන් පසුව විශාලතම සිරකරුවන් හුවමාරුව යුක්‍රේනය සහ රුසියාව අතර සිදුවුනා.
ඉස්තාන්බුල්හි පැවති සෘජු සාකච්ඡාවලදී එකඟ වූ පරිදී හමුදා භටයින් 270 දෙනෙකු සහ සිවිල් වැසියන් 120 දෙනෙකු දෙපාර්ශවයම ආපසු භාර දී තිබෙනවා.
රුසියානු ආරක්ෂක අමාත්‍යාංශය පවසා සිටියේ මෑතකදී රුසියාවේ Kursk දේශසීමා කලාපයේ දී යුක්‍රේන හමුදා විසින් අල්ලා ගන්නා ලද හමුදා භටයින් සහ සිවිල් වැසියන්, භාර දුන් අය අතර සිටින බවයි.
ඔවුන් දැනට බෙලාරුසියානු භූමියේ සිටින අතර වෛද්‍ය පරීක්ෂණ සහ ප්‍රතිකාර සඳහා රුසියාවට ගෙන යාමට නියමිතයි.
රුසියාව නැවත භාරදුන් පිරිස අතරට කාන්තාවන් තිදෙනෙක් සහ 2022 වසරේ සිට රඳවාගෙන සිටි සොල්දාදුවන් සහ සිවිල් වැසියන් ඇතුලත් වී තිබුනා.
දෙපාර්ශ්වයම සිරකරුවන් 1,000 ක් හුවමාරු කර ගැනීමට එකඟ වී ඇති අතර ඉදිරි දිනවලදී තවත් හුවමාරු කිරීම් සිදුවන බවයි වාර්තා වන්නේ.
