ඔස්ට්‍රේලියාවේ වැඩිපුරම මාර්ග අනතුරුවලට ලක්වන රියදුරන් අතර තාවකාලික බලපත්‍ර හිමි රියදුරන් සිටින බවට අනාවරණය වී තිබෙනවා.
බලධාරීන් හෙළිකරන්නේ අනතුරුදායක රිය පැදවීම්වලදී ඩෑෂ්කැම් දර්ශනවලින් බහුතරයක් රියදුරන් යෞවනයන් බවයි.
වික්ටෝරියා රජය පවසන්නේ තරුණයින්ට වයස අවුරුදු 18 වන තෙක් P-තහඩුවක් ලබා ගැනීමට ඉඩ නොදීමට ගත් තීරණයට ප්‍රධාන සාධකයක් වන්නේ මෙය බවයි.
නමුත් නිව් සවුත් වේල්ස්, දකුණු ඕස්ට්‍රේලියාව සහ ක්වීන්ස්ලන්ඩ් වැනි ස්ථාන වෙත තරුණයින් හොර රහසේ යන බවට අනාවරණය වී තිබෙනවා.
ඒ එම ප්‍රාන්තවල රියදුරු බලපත්‍රයක් ලබාගත හැකි අවම වයස අවුරුදු 17 ක් වීම හේතුවෙන්.
ඒ හේතුවෙන් යෞවනයන් තම බලපත්‍ර ලබා ගැනීම සඳහා වෙනත් ප්‍රාන්තවල නිවාඩු නිකේතනවල හෝ පවුලේ සාමාජිකයින්ගේ ලිපිනයන් භාවිතා කරන බවටයි අනාවරණය වී ඇත්තේ.
වික්ටෝරියා පොලීසිය පවසන්නේ නොමඟ යවන තොරතුරු සැපයීම ඇතුළුව වංචනික ලෙස බලපත්‍රයක් ලබා ගැනීම අපරාධයක් බවයි.
කෙසේවෙතත් අන්තර් රාජ්‍ය බලපත්‍ර ලබා ගන්නා බාල වයස්කාර රියදුරන්ට එරෙහිව තවමත් කිසිදු චෝදනාවක් ගොනු කර නොමැති බවයි විශ්වාස කෙරෙන්නේ.
වික්ටෝරියා මාර්ග නීති යටතේ, පදිංචිකරුවෙකු වී මාස හයක් ඇතුළත අන්තර් රාජ්‍ය බලපත්‍රයක් මාරු කිරීමට අපොහොසත් වීම බලපත්‍ර රහිත රිය පැදවීමක් ලෙස සැලකෙනවා.
එවැනි වැරදිකරුවන්ට ඩොලර් 11,855 දක්වා දඩ සහ නඩු පැවරුවහොත් සිර දඬුවම් පවා නියම කළ හැකි බවයි වික්ටෝරියා පොලීසිය අවධාරණය කළේ.
