ඔස්ට්‍රේලියාවේ යෞවනයන් මත්පැන් පානය කිරීම අඩු වී ඇති බව අධ්‍යයනයකින් හෙළිවී තිබෙනවා.
සමාජ මාධ්‍ය හා පාසල් මගින් අනතුරු ඇඟවීම් සිදු කිරීම ඊට හේතු වී ඇති බවයි හෙළිව ඇත්තේ.
2001 දී, ඕස්ට්‍රේලියාවේ වයස අවුරුදු 14 ත් 17 ත් අතර තරුණ තරුණියන්ගෙන් සියයට 70 ක් පසුගිය මාස 12 තුළ මත්පැන් පානය කර ඇති බව National Drug Strategy Household Survey අනුව වාර්තා වුනා.
එහෙත් පසුගිය වසර කිහිපය තුළ, මෙය තරුණයින් 10 දෙනෙකුගෙන් තිදෙනෙකු දක්වා පහත වැටී තිබෙනවා.
එය ස්වීඩනය සහ එක්සත් රාජධානිය වැනි ධනවත් රටවල දක්නට ලැබෙන පහත වැටීමේ ප්‍රවණතාවක් බවයි සමීක්ෂණ වාර්තා පෙන්වා දෙන්නේ.
මධ්‍යසාර හා මත්ද්‍රව්‍ය පදනමේ Craig Martin පවසන්නේ යෞවනයන් මත්පැන් පානයෙන් වැළකී සිටීමට අධ්‍යාපනය විශාල සාධකයක් වී ඇති බවයි
