නිව් සවුත්වේල්ස් හි ප්‍රදේශ කිහිපයකට මේ වනවිට දරුණු ගංවතුර තත්වයක් ඇති වී තිබෙනවා.
ප්‍රාන්තයේ හදිසි සේවා (SES) පවසන්නේ Wingham, Taree, සහ Dumaresq දූපත්වල ඇතැම් ප්‍රදේශවල පදිංචිකරුවන් ජලගැල්ම හේතුවෙන් නිවෙස්වල සිරවී සිටින බවයි.
චොපර් ලබාගැනීමට නොහැකිවීම හේතුවෙන් ඔවුන් බේරාගැනීමට පැය ගණනක් ගත වනු ඇතැයි හදිසි සේවා අංශ සඳහන් කළා.
ටරී නගරයට වාර්තාගත ගංවතුරක් ඇති වී ඇති අතර දින ගණනක් ඇද හැලුණු අධික වර්ෂාව හේතුවෙන් මැනිං ගඟ අද උදෑසන මීටර් හයක් ඉක්මවා ගොස් ඇතැයි ආපදා කළමණාකරන අංශය පවසනවා.
අද දිනයෙත් වඩාත් දරුණු කාලගුණික තත්වයක් අපේක්ෂා කරන අතර උතුරුමැද වෙරළ තීරයේ සිට ග්‍රැෆ්ටන් දක්වා තද වැසි ඇද හැලෙනු ඇති බවයි කාලගුණ විද්‍යා කාර්යංශය කියාසිටියේ. .
Coffs Harbour, Port Macquarie, Taree, Kempsey, Woolgoolga, Sawtell, Dorrigo, Wingham, සහ Yarrowitch අවට පැය 24 ක් තුළ මිලිමීටර් 150 සිට 200 දක්වා වැසි ඇද හැලීමට ඉඩ ඇති බවද ඔවුන් සඳහන් කළා.
මේ අතර නිව් සවුත් වේල්ස් මාර්ග අමාත්‍ය ජෙනී එයිච්සන් මේට්ලන්ඩ් මෝටර් රථ රියදුරන්ගෙන් ඉල්ලා සිටියේ හදිසි සේවා වලින් ලැබෙන උපදෙස් පිළිපදින ලෙසයි.
