මවක සිය දරුවන් ගිනි තබා මැරීමේ චෝදනාවක් සම්බන්ධයෙන් Queensland පොලීසිය විමර්ශන ආරම්භ කර තිබෙනවා.
Queensland හි Toowoomba ප්‍රදේශයේ නිවසක් තුළ ඇති වූ ගින්නකින් ඇගේ දරුවන් තිදෙනාම මියගියා.
පසුගිය බදාදා අලුයම 12.30 ට පමණ ගින්න ඇති වන අවස්ථාවේ නිවස තුළ පුද්ගලයින් හත් දෙනෙකු සිටියා.
ගිනි නිවන භටයින් ගින්න නිවා දැමීමෙන් පසු නව හැවිරිදි පිරිමි ළමයෙකුගේ මළ සිරුර සොයා ගනු ලැබුවා.
4 හැවිරිදි සහ 7 හැවිරිදි ගැහැණු දරුවන් දෙදෙනෙකු ක්වීන්ස්ලන්ඩ් ළමා රෝහලට ඇතුළත් කිරීමෙන් පසු මියගොස් ඇති බවයි වාර්තා වන්නේ.
පිරිමි පුද්ගලයින් දෙදෙනෙකු සහ 11 හැවිරිදි පිරිමි දරුවෙකු ගින්නෙන් සුළු තුවාල ලබා තිබෙනවා.
චෝදනා එල්ල වු කාන්තාව බරපතල තුවාල සහිතව පොලිස් ආරක්ෂාව යටතේ ප්‍රතිකාර ලබන බවයි පොලිසිය පවසන්නේ.
මිනීමැරුම් චෝදනා තුනක්, මිනීමැරීමට තැත් කිරීම් තුනක් සහ ගිනි තැබීමේ චෝදනාවක් යටතේ කාන්තාව අධිකරණයට ඉදිරිපත් කිරීමට නියමිතයි.
