එක්සත් රාජධානියේ සරණාගතභාවය ඉල්ලාසිටින රටවල් කිහිපයක වීසා අයදුම්පත් සීමා කිරීමට එරට රජය තීරණය කර තිබෙනවා.
ටයිම්ස් පුවත්පත වාර්තා කරන්නේ ස්වදේශ කටයුතු අමාත්‍යංශයේ සැලසුම්වලට අනුව පකිස්තානය, නයිජීරියාව සහ ශ්‍රී ලංකාව වැනි රටවල මෙම නීතිය පනවනු ඇති බවයි.
ඒ අනුව ශ්‍රී ලංකාව ඇතුළු රටවල් සදහා එක්සත් රාජධානියේ වැඩකිරීමට හෝ ඉගෙනීමට පැමිණීමට ඉදිරියේදී වඩාත් අපහසු වනු ඇති.
රැකියාවට හෝ අධ්‍යාපන වීසා මත නීත්‍යානුකූලව එක්සත් රාජධානියට පැමිණ පසුව සරණාගතභාවය සඳහා ඉල්ලුම් කිරීම විශාල ගැටළුවක් වී ඇති බවයි එක්සත් රාජධානියේ අමාත්‍යවරුන් පවසන්නේ.
කෙසේවෙතත් මෙම සීමා කිරීම් සිදුකිරීමට නියමිත රටවල් පිළිබඳ නිශ්චිතව දැනුම් දීමක් මෙතෙක් සිදුකර නොමැති බවද ටයිම්ස් පුවත්පත සඳහන් කළා.
නවතම ස්වදේශ කටයුතු අමාත්‍යංශයේ සංඛ්‍යා ලේඛනවලින් පෙනීයන්නේ පසුගිය වසරේ එක්සත් රාජධානියේ 108,000 කට වැඩි පිරිසක් සරණාගතභාවය ඉල්ලා සිට ඇති බවයි.
එය 1979 වසරෙන් පසුව වාර්තා වූ ඉහළ ම අගය වනු ඇති.
සමස්තයක් වශයෙන් පකිස්ථාන ජාතිකයින් 10,542 ක්, ශ්‍රී ලාංකිකයින් 2,862 ක් සහ නයිජීරියානු ජාතිකයින් 2,841 සරණාගතභාවය ඉල්ලා තිබෙනවා.
