අලෙවියට ඇති ගෘහ භාණ්ඩ පිළිබඳ ආරක්ෂණ තොරතුරු මැයි 4 වනදා සිට පාරිභෝගිකයින්ට ඉදිරිපත් කළ යුතු බව ඔස්ට්‍රේලියා පාරිභෝගික ආරක්ෂණ අංශය අනිවාර්ය කර තිබෙනවා.
ගෘහ භාණ්ඩ කඩා වැටීමේ අවදානම් පිළිබඳ පාරිභෝගිකයින්ට ආරක්ෂිත අනතුරු ඇඟවීම් ලබාදිය යුතු බවයි එම අංශය පෙන්වාදෙන්නේ.
පාරිභෝගික ආරක්ෂණ අංශයේ නියෝජ්‍ය සභාපතිවරයා පැවසුවේ ගෘහ භාණ්ඩ කඩාවැටීමෙන් සිදුවන අනතුරු සහ මරණ අවම කිරීමේ අරමුණින් මෙම පියවර ගත් බවයි.
සෙන්ටිමීටර් 686 ක් හෝ ඊට වැඩි උසකින් යුත් ගෘහ භාණ්ඩ රාශියකට මෙම ප්‍රමිතිය පිළිබඳ තොරතුරු අදාල වනවා.
ගෘහ භාණ්ඩවලට අනතුරු ඇඟවීමේ ලේබල් ඇමිණීම සහ එකලස් කිරීම, නැංගුරම් දැමීමේදී ආරක්ෂිත උපදෙස් ඇතුළත් කිරීම සම්බන්ධ තොරතුරු ඊට ඇතුලත් කළ යුතු වනවා.
නව රෙගුලාසි උල්ලංඝනය කරන සැපයුම්කරුවන්ට බරපතල දඩුවම්වලට මුහුණදීමට සිදුවන බවයි පාරිභෝගික ආරක්ෂණ අංශය අවධාරණය කරන්නේ.
ඒ අනුව පුද්ගලයෙකු සඳහා ඩොලර් මිලියන දෙකහ මාරක සහ ව්‍යාපාර සඳහා ඩොලර් මිලියන 50 ක දඩ නියම කරන බවයි එම අංශය කියාසිටියේ.
සෑම වසරකම ඔස්ට්‍රේලියානුවන් 900 කට අධික සංඛ්‍යාවක් ගෘහ භාණ්ඩ පෙරළීමෙන් තුවාල ලබන අතර ඉන් වඩාත්ම අවදානමට ලක්වන වයස් කාණ්ඩය වන්නේ අවුරුදු 4 ට වැඩි දරුවන්.
2000 වසරේ සිට මේ දක්වා ඔස්ට්‍රේලියාවේ ගෘහ භාණ්ඩ සහ රූපවාහිනී කඩා වැටීමේ ප්‍රතිඵලයක් ලෙස වයස අවුරුදු පහට අඩු ළමුන් 17 දෙනෙකු ඇතුළු ව අවම වශයෙන් පුද්ගලයින් 28 දෙනෙකු මිය ගොස් තිබෙනවා.
පාරිභෝගික ආරක්ෂණ අංශය පාරිභෝගිකයින්ට උපදෙස්දෙන්නේ අනතුරු ඇඟවීමේ ලේබල් ගැන සොයා බලන ලෙස හා බර භාණ්ඩ අවබෝධයෙන් හා ආරක්ෂිතව තබන ලෙසයි.
