ලොව පුරා Minecraft චිත්‍රපටය තිරගත කිරීමේදී සමාජ මාධ්‍ය තුළ වෛරල් වන ප්‍රේක්ෂකයින්ගේ කලබලකාරී හැසිරීමක් මෙල්බන් සිනමා ශාලාවකදීත් වාර්තා වනවා.
ටික්ටොක් වීඩියෝවක් ලෙස ව්‍යාප්ත වන මෙම කලහකාරී හැසිරීම ඊයේ මෙල්බන් නැගෙනහිර සිනමා ශාලාවක තරුණයින් පිරිසක් ගිනි නිවන උපකරණයක් පුපුරුවා හැරීමෙන් සිදුකර ඇති බවයි වාර්තා වන්නේ.
Minecraft චිත්‍රපටයේ කලහකාරී ලෙස හැසිරෙන “චිකන් ජොකී” චරිතය නිරූපනයට යෞවනයන් ටික් ටොක් හි පෙළඹී ඇති බවයි අනාවරණය වී ඇත්තේ.
මෙහි එක් විශේෂිත දර්ශනයකදී ඇතැම් යෞවනයන් පිටි සහ පොප්කෝන් ගසා කලබලකාරී ලෙස හැසිරී ඇති බවද වාර්තා වනවා.
මෙල්බන් සිනමා ශාලාවේ සිටි නරඹන්නෙක් ප්‍රකාශකලේ යෞවනයන්ගේ මෙම සිද්ධියෙන් බොහෝ දරුවන් මෙන්ම වැඩිහිටියන් ද බියට පත්වූ බවයි.
ඔවුන් හුස්ම ගැනීමට නොහැකිව දැඩි අපහසුතා රැසකට මුහුණදුන් බව ඇය කියාසිටියා.
ප්‍රේක්ෂකයින් පෙන්වාදෙන්නේ ළමුන් ‘චිකන් ජොකී’ නම් දර්ශනයකට ප්‍රතිචාර දැක්වීමට පොප්කෝන් විසි කිරීම, අත්පුඩි ගැසීම සහ කෑගැසීම් සිදුකිරීම සමාජ මාධ්‍යවල වෛරල් ප්‍රවනතාවක් බවට පත්ව ඇති බවයි.
