මෙල්බන් නගරය කේන්ද්‍ර කරගෙන ක්‍රියාත්මක වන තරුණ අපරාධ රැල්ලට හේතුව ප්‍රාන්ත නීතිවල පවතින ලිහිල් භාවය බවට අධිකරණ මනෝ විද්‍යාඥයින් පෙන්වා දී තිබෙනවා.
මෙල්බන් හි නිරතුරුව සිදුවන නිවාස කොල්ලකෑම්, මෝටර් රථ සොරකම්, පහරදීම්, පිහි ඇනුම් ඇති අපරාධ ක්‍රියා දිනෙන් දින ඉහළ යමින් පවතින බවයි අධිකරණ මනෝවිද්‍යාඥ ටිම් වොට්සන් මුන්රෝ කියා සිටියේ.
පසුගිය වසර දෙක තුළ වික්ටෝරියා ප්‍රාන්තය තුළ තරුණයින් විසින් සිදුකළ අපරාධ ක්‍රියාකාරකම් 23,810 ක් පමණ වාර්තා වී තිබෙනවා.
මෙවැනි තරුණ අපරාධකරුවන් අත්අඩංගුවට ගෙන පැය කිහිපයක් ඇතුලත ඇප මත මුදා හැරීමෙන් පොලීසිය එම තරුණයින්ට විහිළුවක් වී ඇති බවයි ටිම් වොට්සන් පෙන්වා දෙන්නේ.
අවුරුදු 10 ක තරම් කුඩා වයසැති දරුවන් අපරාධ සඳහා යොමුවීමට හේතුව වැඩිහිටියන් පමණක් නොව සමාජ මාධ්‍යය ද වගකිව යුතු බවයි ඔහු කියා සිටියේ.
සමාජ මාධ්‍යයන් තුළ තරුණ අපරාධකරුවන් ජනප්‍රියතාවයට ඔසවා තැබීමෙන්ද දරුවන් ඒවාට වඩාත් යොමුවන බව අධිකරණ මනෝවිද්‍යාඥවරයා පැවසුවා.
ඒ හේතුවෙන් ඇප ලබාදීම හැකිතාක් සීමා කළ යුතු බවයි අධිකරණ මනෝවිද්‍යාඥවරයාගේ යෝජනාව වන්නේ.
