එක්සත් රාජධානියේ පූර්ණ සහය යුක්‍රේනයට ලැබෙන බව බ්‍රිතාන්‍ය අගමැති කීර් ස්ටාර්මර් අවධාරණය කරනවා.
ජනාධිපති ඩොනල් ට්‍රම්ප් සමග පැවති විවේචනාත්මක සාකච්ඡාවෙන් අනතුරුව ඊයේ යුක්‍රේන ජනාධිපති වොලද්මීර් සෙලෙන්ස්කි සහ බ්‍රිතාන්‍ය අගමැති කීර් ස්ටාර්මර් අතර හමුවක් සිදුව තිබෙනවා.
සිය රට වෙනුවෙන් දක්වන සහය වෙනුවෙන් එහිදී යුක්‍රේන ජනාධිපතිවරයා එක්සත් රාජධානි වැසියන්ට මෙන්ම අග්‍රාමාත්‍යවරයාට ද සිය කෘතඥතාව පළකළ බවයි වාර්තා වන්නේ.
මේ අතර යුක්‍රේනය සහ මහද්වීපය පුරා ආරක්ෂාව ඉහළ නැංවීම පිළිබඳ යුරෝපා නායකයින්ගේ සමුළුව පැවැත්වීම නියමිතව තිබෙනවා.
ඊට පෙර හදිසියේ බ්‍රිතාන්‍ය අගමැති සහ යුක්‍රේන ජනාධිපතිවරයා අතර මෙම ද්විපාර්ශවික හමුව සිදුව ඇති බවයි විදෙස් මාධ්‍ය පවසන්නේ.
මේ අතර යුක්‍රේන ජනාධිපතිවරයා අද බැකින්හැම් මාලිගය අසල පිහිටි ලැන්කැස්ටර් හවුස් හි දී 3 වන චාල්ස් රජු හමුවීට ද නියමිතයි.
