ඉදිරියේ දී පැවැත් වීමට නියමිත ඔස්ට්‍රේලියා ෆෙඩරල් මැතිවරණය කෙරෙහි බොහෝ දෙනාගේ අවධානය යොමු වී තිබෙනවා.
කෙසේ වෙතත් නවතම Newspoll ප්‍රතිඵල හරහා අනාවරණය වී ඇත්තේ පාලක කම්කරු පක්ෂයට මෙවර ෆෙඩරල් මැතිවරණය ජයග්‍රහණය කිරීම දුෂ්කර වනු ඇති බවයි.
මෙවැනි පසුබිමක් තුළ ඉදිරි මැතිවරණ ජයග්‍රහණය තමන් සුළුවෙන් නොසලකන බවයි අග්‍රාමාත්‍ය ඇන්තනී ඇල්බනීස් විසින් මාධ්‍ය වෙත අවධාරණය කර ඇත්තේ.
නවතම Newspoll ප්‍රතිඵල හරහා පෙන්නුම් කෙරෙන්නේ පාලක කම්කරු පක්ෂයේ ප්‍රාථමික ඡන්ද (Primary Vote) ප්‍රතිශතය 31% ක් දක්වා පහත වැටී ඇති බවයි.
පසුගිය දෙසැම්බර් මාසයේ සිට විපක්ෂ ලිබරල් සන්ධානයේ ඡන්ද ප්‍රතිශතය 39% ක් ලෙස එහි සටහන් වී තිබීම ද විශේෂත්වයක්.
කෙසේ වෙතත් පසුගිය ෆෙඩරල් මැතිවරණයේ දී කම්කරු පක්ෂයේ ප්‍රාථමික ඡන්ද පදනම 32.5% ක් ලෙස ද විපක්ෂ ලිබරල් සන්ධානයේ ප්‍රාථමික ඡන්ද පදනම 35.5% ක් ලෙස සටහන් වී තිබුණා.
එවැනි පසුබිමක දී 2022 වසරේ පැවති ඔස්ට්‍රේලියා ෆෙඩරල් මැතිවරණය ජයග්‍රහණය කරනු ලැබුවේ වත්මන් පාලක කම්කරු පක්ෂය විසිනුයි.
