දෙවන ලෝක යුද සමයේදී 19 හැවිරිදි පිලිප් කුමරු නාවික හමුදාවේ කැඩේට් භටයෙකු ලෙස සේවය කළ අතර ඒ සමයේදී ඔහු ස්ථානගත කොට සිට ඇත්තේ ශ්රී ලංකාවේයි.
1940 වර්ෂයේදී පිලිප් කුමරු සේවය කර තිබුනේ HMS Ramilies නම් යුද නෞකාවේයි. එම නෞකාව ඒ වන විට කොළඹ ස්ථානගත කර තිබුණා.
එම නෞකාවට පැවරී තිබුණු ප්රධාන කාර්ය භාරය වුයේ ඕස්ට්රේලියාවේ සිට පැමිණෙන භාණ්ඩ ප්රවාහන නෞකාවන්ට කිසිදු බාධාවකින් තොරව මධ්යධරණ මුහුද දක්වා ගමන් කිරීමට ආරක්ෂාව සැපයීමයි.
පිලිප් කුමරු ඉන් පසුව HMS Kent සහ HMS Shropshire නම් යුද නෞකාවල සේවය කරනු ලැබුවා.
වරක් ත්රිකුණාමලය වරායේ මිණුම් කටයුතු සඳහා එහි සිටින නාවික නිලධාරින් කණ්ඩායමකගේ සහය සඳහා කොළඹ සිටි පිලිප් කුමරුට යාමට සිදුව තිබෙනවා.
එහිදී ඔහු විසින් රිදී සහ කලු පැහැයෙන් යුත් Standard 9 වර්ගයේ මෝටර් රථයක් මිලට ගෙන එය තමන් විසින්ම පදවා ගෙන කොළඹ සිට ත්රිකුණාමලයට ගොස් යලි පැමිණ තිබුණා.
එම මෝටර් රථය මේ වන විට කොළඹ පිහිටි ගෝල්ෆේස් හෝටලයේ කෞතුකාගාරයේ ප්රදර්ශනයට තබා තිබෙනවා.
පිලිප් කුමරු දෙවතාවක් ශ්රී ලංකාවට පැමිණි අතර ඒ සෑම අවස්ථාවකදීම තමන් මිලට ගත් පළමු මෝටර් රථය දැක බලා ගැනීමට පැමිණ තිබීමද විශේෂත්වයක්.