තමා පාර්ලිමේන්තු මන්ත්‍රී ධූරයෙන් ඉවත් කිරීමට පියවර ගැනීම වළක්වාලන රිට් ආඥාවක් නිකුත් කරන්නැයි ඉල්ලමින් රංජන් රාමනායක මහතා ගොණුකර තිබූ රිට් පෙත්සම විභාගයට නොගෙනම ප්‍රතික්ෂේප කිරීමට අභියාචනාධිකරණය නියෝග කර තිබෙනවා.
අභියාචනාධිකරණයේ සභාපති විනිසුරු අර්ජුන ඔබේසේකර සහ මායාදුන්නේ කොරයා යන මහත්වරුන්ගෙන් සමන්විත විනිසුරු මඩුල්ල විසිනුයි නියෝගය ලබාදුන්නේ.
අධිකරණයට අපහාස කිරීමේ චෝදනාව සම්බන්ධයෙන් රන්ජන් රාමනායක මහතාට ශ්‍රේෂ්ඨාධිකරණය විසින් වසර හතරක සිර දඩුවම් නියම කරනු ලැබුවේ පසුගිය ජනවාරි 12 වැනි දායි.
ඒ අනුව සිය මන්ත්‍රී ධුරය අහෝසි නොවන නියෝගයක් පාර්ලිමේන්තු මහ ලේකම්වරයාට බල පැවැත්වෙන පරිදි ලබා දෙන ලෙසයි අදාළ රිට් පෙත්සමෙන් ඉල්ලා තිබුණේ.
මේ අතර සිර දඩුවම් නියමවී සිටින පාර්ලිමේන්තු මන්ත්‍රී රන්ජන් රාමනායක මහතාට මෙම සතියේදී එක් දිනක් හෝ මැතිසබයට පැමිණීමට නොහැකි වුවහොත් එම මන්ත්‍රී ධූරය ඉබේම අහෝසි වන බව පාර්ලිමේන්තු ආරංචි මාර්ග පවසනවා.
