නිසි නින්දක් නොමැති අයට වැළදෙන රෝග ගැන අලුත්ම අනාවරණයක්

ක්‍රමවත් නින්දක් නොමැති පුද්ගලයින්ට හෘදයාබාධ සහ ආඝාතය වැනි රෝග වලට ගොදුරුවීමේ වැඩි අවදානමක් පවතින බව නවතම අධ්‍යනයක දී තහවුරු වී තිබෙනවා.

කැනඩාවේ ඔටාවා විශ්ව විද්‍යාල පර්යේෂණ කණ්ඩායමක් විසින් මෙම අධ්‍යයනය සිදු කර ඇති අතර නින්දෙහි ප්‍රමාණාත්මක කාලය නොව අඛණ්ඩ නින්ද සම්බන්ධයෙන් මෙහිදි අවදානය යොමුකර තිබුණා.

අවුරුදු 40ත් 79ත් අතර වයසෙහි පසුවන පුදගලයින් 72269ක් යොදාගනිමින් මෙම අධ්‍යනය සිදු කර ඇති අතර අක්‍රමවත් නින්දක් සහිත පුද්ගලයින්ට හෘදයාබාද හා ආඝාත වැනි රෝග වලට වැඩි බලපෑමක් පවතින බව හෙළිව තිබෙනවා.

එසේම ක්‍රමවත් නින්දක් පවතින පුද්ගලයින්ට සාපේක්ෂව අක්‍රමවත් නින්දක් පවතින පුද්ගලයින්ට හෘදයාබාධ ඇතිවිමේ ප්‍රවනතාව සියයට 26කින් ඉහළ බව සඳහන්.

සැම පුද්ගලයෙකුටම ගුණාත්මක නින්දක් අවශ්‍ය වන අතර අඛණ්ඩ නින්ද සැමවිටම මගහැරීම පුද්ගලයින් සඳහා අතුරු ආබාධ ඇති කරන බවයි වාර්තා වන්නේ.

තවද මත්පැන් පානය සහ දුම්පානය වැනි සාධකද පුද්ගල අඛණ්ඩ නින්දට බලපෑම් කරන බවද පර්යේෂණ වලදී තහවුරු වී තිබෙනවා.

අවුරුදු 18 සිට 64 දක්වා පුද්ගලයින් සඳහා රාත්‍රියකට පැය හතේ සිට නවය දක්වා නින්දක් අවශ්‍ය වන බවයි වෛද්‍යවරුන් නිර්දේශ කරන්නේ.

අවුරුදු 65 ට වැඩි අය සඳහා පැය හතේ සිට අට දක්වා නින්දේ දෛනික නිර්දේශ කර තිබෙනවා.