හිටපු රාජ්‍ය අමාත්‍ය ලොහාන් රත්වත්තේ මහතා එළැඹෙන 07 වැනිදා තෙක් රක්ෂිත බන්ධනාගාරගත කිරීමට නියෝග කර තිබෙනවා.
ඒ අද (31) පස්වරුවේ සැකකාර හිටපු අමාත්‍යවරයාව නුගේගොඩ වැඩබලන මහේස්ත්‍රාත්වරයා හමුවට ඉදිරිපත් කළ අවස්ථාවේදියි.
මිරිහාන පොලිසිය විසින් වැඩබලන මහේස්ත්‍රාත්වරයා හමුවට අද පස්වරුවේ හිටපු අමාත්‍යවරයා රැගෙන ආ බව සදහන්.
ලියාපදිංචි නොකළ බවට සැලකෙන සුඛෝපභෝගී වෑන් රථයක් ළඟ තබා ගැනීමේ චෝදනාවට අත්අඩංගුවට ගත් හිටපු රාජ්‍ය අමාත්‍යවරයාව අද පස්වරුවේදියි මිරිහාන පොලිස් ස්ථානයට රැගෙන විත් ඇත්තේ.
ඒ සැකකාර රත්වත්තේ මහතාව අද පෙරවරුවේ ඔහුගේ ගම් පළාත වන මහනුවර, කටුගස්තොට දී අත්අඩංගුවට ගැනීමෙන් පසුවයි.
හිටපු රාජ්‍ය අමාත්‍ය ලොහාන් රත්වත්තේ මහතාගේ බිරිඳ වන ශෂී ප්‍රභා රත්වත්තේ මහත්මියට අයත් මිරිහාන – ඇඹුල්දෙණිය ශාලාව පාරේ තෙමහල් නිවසක නවතා තිබියදී මෝටර් රථ ප්‍රවාහන දෙපාර්තමේන්තුවේ ලියාපදිංචි නොකළ සුඛෝපභෝගී වර්ගයේ නවීන සුදු පැහැති මෝටර් රථයක් මෙලෙස පොලිස් භාරයට ගැනුණා.
