XEC ලෙසින් හැඳින්වෙන නව COVID ප්‍රභේදයක් ව්‍යාප්ත වෙමින් පවතින අතර එය සති කිහිපයකින් ඔස්ට්‍රේලියාවට ළඟා වනු ඇති බවට සෞඛ්‍ය විශේෂඥයින් අනතුරු අඟවනවා.
මොනෑෂ් විශ්ව විද්‍යාලයේ වසංගත රෝග සහ නිවාරණ වෛද්‍ය සහකාර මහාචාර්ය ජේම්ස් ට්‍රෝවර් පැවසුවේ ප්‍රභේද දෙකක් එකතු වීමෙන් XEC නිර්මාණය වී ඇති අතර එය නවතම කොවිඩ් වෛරස ප්‍රභේදය බවට පත්විය හැකි බවයි.
මෙම නව ප්‍රභේදය තවමත් අලුත් වුවද එහි රෝග ලක්ෂණ මීට පෙර පැවති කොවිඩ් තත්වයන්ට සමාන සෙම්ප්‍රතිශ්‍යාව හෝ උණ ලෙසටයි සැලකෙන්නේ.
අධික උණ, කැස්ස හෝ උගුරේ අමාරුව, සිරුරේ වේදනාව සහ තෙහෙට්ටුව වැනි රෝග ලක්ෂණ ද පැවතිය හැකියි.
මහාචාර්ය ජේම්ස් ට්‍රෝවර් ප්‍රකාශ කළේ වෙනත් රෝග ලක්ෂණ තිබේද යන්න විශ්ලේෂණය කිරීමට මෙතෙක් රෝගීන්ගේ ප්‍රමාණවත් දත්ත ලැබී නොමැති බවයි.
XEC වෛරසය පළමු වරට පසුගිය ජුනි මාසයේදී ජර්මනියේ බර්ලින් නුවරදී හඳුනාගෙන ඇති අතර එතැන් සිට වේගයෙන් ව්‍යාප්ත වී ඇති බව සඳහන්.
ඩෙන්මාර්කය, නෙදර්ලන්තය, පෝලන්තය, නෝර්වේ, ප්‍රංශය, එක්සත් රාජධානිය, යුක්රේනය, එක්සත් ජනපදය සහ කැනඩාව ඇතුළු රටවල් 27 ක මෙම නව වෛරස් ප්‍රභේදය හඳුනා ගත් බවට වාර්තා කර තිබෙනවා.
නව ප්‍රභේදය ඔස්ට්‍රේලියාවට මෙතෙක් පැමිණ නොමැති අතර මහාචාර්ය ජේම්ස් ට්‍රෝවර් පැවසුවේ මෙම ප්‍රභේදය ඉදිරි සති කිහිපය තුළ ඔස්ට්‍රේලියාවට ළඟා විය හැකි බවයි.
වර්තමාන COVID එන්නත් නව ප්‍රභේදයට ගැලපෙන අතර ජනතාව තම බූස්ටර් එන්නත් මාත්‍රා සඳහා සෞඛ්‍ය මාර්ගෝපදේශ අනුගමනය කළ යුතු බව ද ඔහු සඳහන් කළා.
අවදානම් කණ්ඩායමක සිටී නම් හෝ විශේෂයෙන් වයස අවුරු 75 ට වැඩි නම් ඔබ සෑම මාස හයකට වරක් බූස්ටර් එන්නතක් ලබා ගත යුතු බවයි මහාචාර්යවරයා අවධාරණය කළේ.
