න්‍යෂ්ටික බලාගාර 7ක් ඉදිකිරීමට ෆෙඩරල් විපක්ෂය ඉදිරිපත් කර ඇති සැලැස්ම හේතුවෙන් පවුල් ඒකකවලට වසරකට ඩොලර් 655කින් පමණ බලශක්ති බිල්පත් වැඩි වන බව නව වාර්තාවක් පෙන්වා දෙනවා.
බලශක්ති ආර්ථික හා මූල්‍ය විශ්ලේෂණ ආයතනය (IEEFA) විසින් මෙම පර්යේෂණය සිදු කර ඇත්තේ බටහිර රටවල න්‍යෂ්ටික ව්‍යාපෘති සමග සංසන්දනය කර මෙම සැලැස්ම මගින් මෙරට පවුල් ඒකකවලට ඇති කරන බලපෑම සොයා බැලීම සඳහා යි.
එමගින් අනාවරණ වී ඇත්තේ න්‍යෂ්ටික බලාගාර පිහිටුවීමේ පිරිවැය පියවා ගැනීම සඳහා සාමාන්‍යයෙන් ඔස්ට්‍රේලියානුවන්ට සෑම වසරකම තම බලශක්ති බිල්පත් සඳහා ඩොලර් 665 ක් වැඩිපුර ගෙවීමට සිදුවන බවයි.
එක්සත් රාජධානියේ සිදු කර ඇති පිරිවැය සලකා බැලීමේදී නිවසක් සඳහා සාමාන්‍යයෙන් සෑම වසරකම ඩොලර් 1000 කට වඩා වැඩි වන අතර අවම වියදම සලකා බැලීමේදී වසරකට අමතර ඩොලර් 300ක් පමණ වියදම් වන බවයි සඳහන් වන්නේ.
න්‍යෂ්ටික බලාගාර වලින් නිපදවන විදුලියේ පිරිවැය නැගෙනහිර ඔස්ට්‍රේලියාවේ විදුලි උත්පාදන පිරිවැය මෙන් 1.5 සිට 3.8 ගුණයක් වැඩි වනු ඇති බව විශ්ලේෂකයන් අනාවරණ කරගෙන තිබෙනවා.
රජයේ සහනාධාරයක් නොමැතිව න්‍යෂ්ටික බලාගාර වාණිජමය වශයෙන් ශක්තිමත් වී පැය 24ම විදුලිය උත්පාදනය සඳහා විදුලි බිල මෙම මට්ටම් දක්වා ඉහළ යා යුතු බවයි සඳහන් වන්නේ.
කෙසේ වෙතත්, විපක්ෂය මීට මාස තුනකට පෙර තම න්‍යෂ්ටික සැලැස්ම එළිදැක්වුව ද එහි පිරිවැය හෝ වැඩිදුර තොරතුරු මෙතෙක් නිකුත් කර නැහැ.
