JobSeeker, age pension සහ Youth Allowance යන Centrelink සමාජ ආරක්ෂණ ගෙවීම් රැසක් අද සිට ඉහළ යාමට නියමිතව තිබෙනවා.
මෙම දීමනා වැඩි කිරීමේ සහනය ඔස්ට්‍රේලියාවේ මිලියන පහකට වැඩි පිරිසකට බලපානු ඇති බවයි සඳහන් වන්නේ.
Age pension, Carer payment, Parenting payment, JobSeeker payment, සහ Rent assistance යන ගෙවීම් සඳහා ජනතාවට වැඩි මුදලක් හිමි වනු ඇති.
JobSeeker දීමනා ලබන්නන්ට සති දෙකකට අමතර ඩොලර් 71.20ක් ලැබෙන බව සඳහන්.
Age Pension, ආබාධිත විශ්‍රාම වැටුප් (Disability Support Pension) සහ රැකවරණ ගෙවීම් (Carer Payments), Commonwealth Rent Assistance, රැකියා සොයන්නන්ට ලැබෙන දීමනා (JobSeeker) සහ මාපිය ගෙවීම් (Parenting Payments) ඇතුළු විශ්‍රාම වැටුප් සහ තවත් සහනාධාර රැසකට මෙය අදාළ වනවා.
සැප්තැම්බර් 20 සිට බලාත්මක වනු පරිදි සාමාන්‍යයෙන් සති දෙකකට ඩොලර් 41.50 දක්වා වැඩිවීමක් සිදු වන අතර ගෙවීම් මත පදනම්ව එය වෙනස් විය හැකියි.
කුලී ආධාර සහ රැකියා සොයන්නන්ගේ ගෙවීම් සඳහා වෙනස්කම් 20 වනදා සිට ක්‍රියාත්මක වන අතර Commonwealth Rent Assistance ආධාරවල උපරිම අනුපාත සියයට 10 කින් වැඩි කෙරෙනු ඇති.
දරුවන් නොමැතිව තනිවම නිවාස කුලියට ගන්නා තනි පුද්ගලයෙකුට ලැබෙන දීමනාව සඳහා සති දෙකකට අමතර ඩොලර් 23ක් ලැබීමට නියමිතයි.
දරුවන් එක් අයෙකු හෝ දෙදෙනෙකු සිටින පවුල්වල, කුලී ආධාර සඳහා සති දෙකකට වරක් කරනු ලබන ගෙවීම ඩොලර් 27.02කින් වැඩි වන බව සඳහන්.
සමාජ සේවා දෙපාර්තමේන්තුව සඳහන් කළේ සතියකට පැය 0 සිට 14 දක්වා වැඩ කිරීමට අර්ධ ධාරිතාවක් ඇති තනි රැකියා සොයන්නන්ට ලැබෙන දීමනාව සති දෙකකට ඩොලර් 849.50ක් දක්වා ඉහළ යන බවයි.
දරුවන් නොමැතිව තනිව සිටින පුද්ගලයන්ට ඔවුන්ගේ ගෙවීම් සඳහා ඩොලර් 15.30 ක වැඩි වීමක් සිදුවන අතර දරුවෙකු සිටින තනි පුද්ගලයන්ට ඩොලර් 19.80ක් වැඩි වීමක් සිදුවීමට නියමිතයි.
