තම නිවාසවල වහලය මත සූර්ය පැනල සවි කර ඇති ඔස්ට්‍රේලියානු පවුල් ඒකක විසින් බලශක්ති බිල්පත් සඳහා වසරකට ඩොලර් බිලියන 3ක් ඉතිරි කරන බව නව සමීක්ෂණ මගින් අනාවරණ වී තිබෙනවා.
දේශගුණ කවුන්සිලයේ නව වාර්තාවකට අනුව අනාවරණ වී ඇත්තේ සුර්ය පැනල සවි කර බලශක්තිය සඳහා ආයෝජනය කිරීම ජීවන වියදම් සහන සඳහා ප්‍රධාන සාධකයක් බවයි.
එමගින් සාමාන්‍ය නිවාසයක් වසරකට ඩොලර් 1500කට වඩා වැඩි මුදලක් ඉතිරි කරන බවයි දේශගුණ කවුන්සිලයේ Seize the Sun වාර්තාව පෙන්වා දෙන්නේ .
සමස්ත ඔස්ට්‍රේලියාවේ වහල මත සූර්ය පැනල සහිත පවුල් ඒකක ඔවුන්ගේ විදුලි බිල්පත් සඳහා වසරකට ඩොලර් බිලියන 3කට ආසන්න මුදලක් ඉතිරි කරන බව එහි සඳහන්.
සූර්ය බලය සහිත නිවාස බලශක්ති මිල වැඩිවීම්වලින් ආරක්ෂා වී ඇති අතර මෙරට නිවාස මිලියන 3.6කට වඩා සූර්ය පැනල සවි කර ඇති බවයි වාර්තා වන්නේ.
2030 වන විට එම සංඛ්‍යාව දෙගුණයක් විය යුතු බව වාර්තාව මගින් ප්‍රකාශ කර තිබෙනවා.
දේශගුණික කවුන්සිලයේ සහකාර මහාචාර්ය ටිම් නෙල්සන් සඳහන් කළේ සුර්ය පැනල සවි කිරීමට අඩු ආදායම්ලාභී පවුල්වලට මුල්‍ය සහනාධාර ලබාදීම වැනි ක්‍රමවලින් මෙම වැඩසටහන් ව්‍යාප්ත කළ යුතු බවයි.
