ඔස්ට්‍රේලියාවේ විරැකියා අනුපාතය අගෝස්තු මාසය සඳහා ද සියයට 4.2 ප්‍රතිශතයක් ලෙස ස්ථාවරව පැවති බව සංඛ්‍යාලේඛන කාර්යාංශය පවසනවා.
නවතම සංඛ්‍යාලේඛනවලට අනුව අගෝස්තු මාසයේදී නව රැකියා 47,000ක් පමණ නිර්මාණය වී ඇති අතර ශ්‍රම වෙළඳපොළ ස්ථාවර තත්වයක පවතින බවයි සඳහන් වන්නේ.
සංඛ්‍යාලේඛන කාර්යාංශයේ කම්කරු සංඛ්‍යාලේඛන ප්‍රධානී කේට් ලැම්බ් සඳහන් කළේ සාමාන්‍ය ප්‍රමාණයට වඩා රැකියා පුරප්පාඩු ප්‍රමාණයක් පවතින අතර ශ්‍රම බලකායට ඇතුළු වී රැකියා සොයා ගැනීමට විශාල පිරිසක් තවමත් බලාපොරොත්තුවෙන් සිටින බවයි.
අගෝස්තු මාසයේදී රැකියාවල නියුතු පුද්ගලයින් සංඛ්‍යාව 47,500 කින් වර්ධනය වූ අතර රැකියා විරහිත පුද්ගලයින් සංඛ්‍යාව 10,500 කින් අඩු වී ඇති බවයි සඳහන් වන්නේ.
ආර්ථිකය සමතුලිතතාවයකට පැමිණීමට සහ උද්ධමනය පාලනය කිරීමට පෙර ඔස්ට්‍රේලියාවේ ශ්‍රම වෙලඳපොල තවත් ලිහිල් විය යුතු බව සංචිත බැංකු නිලධාරීන් පසුගියදා ප්‍රකාශ කර තිබුණා.
රැකියාවේ නිරත ජනගහන අනුපාතය සුළු වශයෙන් ඉහළ ගොස් සියයට 64.3ක් වී ඇති බව සඳහන්.
එමෙන්ම සංඛ්‍යාලේඛන කාර්යාංශයේ දත්ත මගින් පෙන්නුම් කරන්නේ රැකියා විරහිත පශ්චාත් උපාධිධාරීන් සංඛ්‍යාව 2023 නොවැම්බර් සහ 2024 මැයි අතර 24,900 සිට 42,800 දක්වා ඉහළ ගොස් ඇති බවයි.
මෙරට ආර්ථිකය පසුබෑමක් දක්වමින් සිටින අවස්ථාවක මෙම සංඛ්‍යාලේඛණ ප්‍රකාශයට පත්වීමද විශේෂත්වයක්.
