නව රැකියා අවස්ථා 200ක් පමණ නිර්මාණය කරමින් Kmart සුපරි වෙළඳසල් සමූහය සිඩ්නි බටහිර ප්‍රදේශයේ තවත් වෙළඳසැලක් විවෘත කර තිබෙනවා.
මෙම නව වෙළඳසල විවෘත කිරීමත් සමග සමස්ත ඔස්ට්‍රේලියාව පුරා ඇති වෙළඳසැල් සංඛ්‍යාව 320 දක්වා ඉහළ යන බවයි Kmart බලධාරීන් සඳහන් කළේ.
විවෘත කිරීමේ අවස්ථාවට එක්වෙමින් වෙළඳසැලේ ප්‍රකාශකයෙකු පැවසුවේ මෙම ආයතනය ආරම්භ කිරීම මගින් අඩු ආදායම්ලාභී තරුණ පවුල් වැඩි ප්‍රතිශතයක් සිටින බටහිර තදාසන්න ප්‍රදේශවලට සහනයක් ලබාදීමට හැකි වනු බවයි.
St Mary’s ප්‍රදේශයේ ආරම්භ වන වෙළඳසැල්වලින් ඔවුන්ට ප්‍රතිලාභ හිමි වන බවයි එම ප්‍රකාශකයා සඳහන් කළේ.
මේ අතර Kmart Australia ප්‍රධාන විධායක නිලධාරී John Gualtieri සඳහන් කළේ ඔස්ට්‍රේලියානුවන්ට දරා ගත හැකි මුදලකට උසස් තත්ත්වයේ නිෂ්පාදන ලබාදීම මගින් ඔවුන්ගේ දෛනික ජීවිත සාමාන්‍ය මට්ටමකට ගෙන ඒම ආයතනයේ අරමුණ බවයි.
නව වෙළඳසැලක් විවෘත කිරීමේදී වැදගත් වන්නේ නිර්මාණය වන රැකියා පමණක් නොව ජනතාවට පහසු මිලට විශිෂ්ට නිෂ්පාදන ද ලබාදීම බවයි ඔහු කියාසිටියේ.
වෙළඳසැලේ කාර්ය මණ්ඩලයෙන් බහුතරයක් වයස අවුරුදු 21ට අඩු අය වන අතර එම තරුණයින්ට තම ප්‍රජාව තුළදීම සේවා පළපුරුද්ද ලබා ගැනීමට හැකි වීම ගැන සතුටු වන බව මෙම අවස්ථාවට එක්වූ Western Sydney ගුවන් තොටුපළ අමාත්‍ය Pru Car සඳහන් කළා.
