භයානක ශ්වසන රෝගී තත්වයක් වන RSV වෙනුවෙන් ලබාදෙන එන්නත දකුණු ඔස්ට්‍රේලියාවේ ගර්භනී කාන්තාවන්ට සහ ළදරුවන්ට නොමිලේ ලබාදීමට තීරණය ඇතැයි වාර්තා වනවා.
මෙම රෝගී තත්වය කුඩා දරුවන් අතර බහුලව පැතිර යාම හේතුවෙන් ඔවුන් ආරක්ෂා කර ගැනීමේ අරමුණ සහිතව මෙම පියවර ගෙන ඇති බවයි වාර්තා වන්නේ.
මේ අනුව නොමිලේ RSV ප්‍රතිශක්තිකරණ එන්නත් වැඩසටහන් දෙකක් ක්‍රියාත්මක වන අතර පළමුවැන්න ගැබිණි කාන්තාවන් වෙනුවෙන් ලබාදෙන බව සඳහන්.
ඒ සඳහා ඉක්මනින් අනුමතිය ලබාදීමට බලාපොරොත්තු වන අතර සියලුම ගර්භනී කාන්තාවන්ට නොමිලේ ලබා ගත හැකි බව දකුණු ඔස්ට්‍රේලියා සෞඛ්‍ය අංශ ප්‍රකාශ කළා.
මෙම එන්නත මගින් RSV රෝගයේ දරුණු බලපෑම්වලින් මව සහ බිළිඳා යන දෙදෙනාටම ද්විත්ව ආරක්ෂාවක් ලබා දෙන බවයි පැවසෙන්නේ.
එම එන්නත ලබා ගැනීමට නොහැකි වූ හෝ ඉහළ අවදානම් සහිත දරුවන් සිටින මව්වරුන් සඳහා විකල්ප එන්නතක් ලබා ගත හැකි බව දැනුම් දී තිබෙනවා.
දැනට දකුණු ඔස්ට්‍රේලියාව තුල සාමාන්‍ය ජනතාවට RSV එන්නතක් ලබා ගැනීම සඳහා ඩොලර් සියගණනක් ගෙවීමට සිදුවන අතර මෙතෙක් එය නොමිලේ ලබා ගැනීමට හැකි වූ එකම කණ්ඩායම වැඩිහිටියන් පමණයි.
දකුණු ඔස්ට්‍රේලියා සෞඛ්‍ය අංශ බලාපොරොත්තු වන්නේ ගර්භනී කාන්තාවන්ගෙන් සියයට 80ක් ලබන වසරේ නොමිලේ RSV එන්නත ලබා ගනු ඇති බවයි.
