මෙල්බන් සසේෆ්‍රාස් (Sassafras) ප්‍රදේශයේ අධිවේගී මාර්ගයක සිදු වූ රිය අනතුරකින් පැය 10කට පමණ කාලයකට පසු අනතුරට ලක්වූ මෝටර් රථයේ සිරවී සිටි රියදුරා බේරා ගැනීමට හැකිවී ඇතැයි වාර්තා වනවා.
ඔහු ගමන් කළ වාහනය ඊයේ රාත්‍රී 9ට පමණ Sassafras හි Mountain අධිවේගී මාර්ගයෙන් ඉවතට පැන මීටර් 50ක් පමණ ප්‍රපාතයකට පෙරළි ඇති බවයි වාර්තා වන්නේ.
මාර්ගයෙන් ඉවතට ගිය වාහනය කිහිප වතාවක්ම පෙරලී ගොස් පහළින් පිහිටි කැලෑවක ගස් මත රැඳී ඇති බව සඳහන්.
මෙම අනතුරින් රිය ධාවනය කළ තරුණයා තුවාලයක් ලබා මෝටර් රථයේ සුන්බුන් අතර සිරවීම හේතුවෙන් පිටතට පැමිණීමට හැකියාවක් ලැබී නැහැ.
එමෙන්ම අනතුරත් සමග ඔහුගේ දුරකථනය ද සොයා ගැනීමට නොහැකි වීමෙන් හදිසි ඇමතුම් අංශයට දැනුම්දීමට හෝ හැකියාවක් ලැබී නොමැති බවයි වාර්තා වුයේ.
කෙසේවෙතත් අද උදෑසන 7ට පමණ ඔහුගේ දුරකතනයේ එලාම් එකක් ක්‍රියාත්මක වීම හේතුවෙන් ඔහු දුරකථනය ඇති ස්ථානය සොයාගෙන උදව් ඉල්ලා හදිසි ඇමතුම් අංශයට දැනුම්දී තිබෙනවා.
ගිනි නිවීම් නිලධාරීන්, ගිලන් රථ වෛද්‍යවරුන් සහ පොලිසිය එම ස්ථානයට කඩිනමින් ගොස් තිබුණ ද අනතුරට ලක් වූ ස්ථානය ගස්වලින් වැසී තිබීම නිසා මෝටර් රථය සොයා ගැනීම දුෂ්කර වූ බව සඳහන්.
ඒ අනුව පැය 10කට වැඩි කාලයක් රථයේ සිරවී සිටි රියදුරු පෙරවරු 8.30ට පමණ බේරාගෙන හෙලිකොප්ටරයක් මගින් රෝහල් ගත කර තිබෙනවා.
