ලබන මාසයේ පැවැත්වෙන ක්වීන්ස්ලන්ඩ් ප්‍රාන්ත මැතිවරණයෙන් කුමන පක්ෂය ජයග්‍රහණය කළ ද පොදු ප්‍රවාහනයට හඳුන්වා දුන් ශත 50 ගාස්තුව තවදුරටත් පවත්වාගෙන යාමට ප්‍රධාන පක්ෂ දෙකම පොරොන්දු වී තිබෙනවා.
දින නියමයක් නොමැතිව එය පවත්වාගෙන යාමට ප්‍රධාන පක්ෂ දෙකම ප්‍රතිඥා දී ඇති අතර ක්වීන්ස්ලන්ඩ් ජනතාවට මේ හේතුවෙන් පොදු ප්‍රවහනයෙන් තවදුරටත් ප්‍රතිලාභ ලැබෙනු ඇති.
පසුගිය ඉරිදා ප්‍රාන්ත අගමැති ස්ටීවන් මයිල්ස් ප්‍රකාශ කළේ මැතිවරණයෙන් තමා තේරී පත් වුවහොත් දැනට අත්හදා බැලීමක් ලෙස ක්‍රියාත්මක ශත 50ක ගාස්තු ක්‍රමය ස්ථිර කරන බවයි.
අගෝස්තු මාසයේදී ආරම්භ කරන ලද මෙම අත්හදා බැලීම හේතුවෙන් ක්වීන්ස්ලන්ඩ් ප්‍රාන්ත පොදු ප්‍රවාහනය භාවිතා කරන පිරිස COVID වසංගත සමයට පෙර පැවති සීමාව ද ඉක්මවා ගොස් තිබුණා.
එමෙන්ම පොදු ප්‍රවාහනය භාවිතා කළ මගීන්ට ඩොලර් මිලියන 37ක් ඉතිරි කර ගැනීමට හැකි වූ බවයි රජය ප්‍රකාශ කළේ.
අගමැතිවරයාගේ ප්‍රකාශයෙන් පසුව විපක්ෂ නායක ඩේවිඩ් ක්‍රිසාෆුලි ද සඳහන් කළේ පොදු ප්‍රවාහනය සම්බන්ධයෙන් ජනතා විශ්වසනීයත්වය වැඩි කිරීම සඳහා ශත 50 ගාස්තු ක්‍රමය පවත්වාගෙන යන බවයි.
මේ වන විට ක්වීන්ස්ලන්ඩ් ප්‍රාන්තයේ දුම්රිය, බස්, ට්‍රෑම් රථ සහ බෝට්ටු සේවා ඇතුළු සියලුම Translink පොදු ප්‍රවාහන සේවා සඳහා ශත 50 ගාස්තුව අදාළ වනවා.
