ඔස්ට්‍රේලියාවේ ගෙයක් ගන්න ඉන්න අයට වැදගත් දැනුම්දීමක්

ඔස්ට්‍රේලියාවේ කුලී නිවැසියන් සඳහා හොඳම සහ නරකම ප්‍රාන්ත නව වෙළඳපල පර්යේෂණ දත්ත මගින් අනාවරණ කර තිබෙනවා.

නව දත්තවලට අනුව කුලී නිවැසියන් සඳහා නරකම තදාසන්න ප්‍රදේශ සහිත ප්‍රාන්තය ලෙසට පළමු තැනට පැමිණ ඇත්තේ නිව් සවුත් වේල්ස් ප්‍රාන්තයයි.

වෙළඳපල පර්යේෂණ ආයතනයක් වන Suburb Trends විසින් මෑත කාලීන කුලී මිල ගණන් මත පදනම්ව නිකුත් කරන ලද Rental Pain Score Index වාර්තාවට අනුව නිව් සවුත්වේල්ස් ප්‍රාන්තයේ තදාසන්න ප්‍රදේශ 12ක කුලී නිවැසියන්ට දරාගත නොහැකි මිල ගණන් පවතින බවයි සඳහන් වන්නේ.

ක්වීන්ස්ලන්ඩ් ප්‍රාන්තයේ තදාසන්න ප්‍රදේශ 10ක්, දකුණු ඔස්ට්‍රේලියාවේ 6ක්, බටහිර ඔස්ට්‍රේලියාවේ 4ක්, වික්ටෝරියා ප්‍රාන්තයේ දෙකක් සහ ටස්මේනියා ප්‍රාන්තයේ එක් උප නගරයක් මෙම ලැයිස්තුවට ඇතුලත්.

නිව් සවුත්වේල්ස් ප්‍රාන්තයේ කුලී නිවැසියන්ට දරා ගත නොහැකි මිලක් පවතින තදාසන්න ප්‍රදේශය ලෙස Tweed Heads South ශ්‍රේණිගත කර ඇති අතර එහි නිවැසියන් ආදායමෙන් සියයට 69ක් කුලි ගෙවීමට වියදම් කරන බව සඳහන්.

Clear Island Waters, Coombabah සහ Bribie Island යනු ක්වීන්ස්ලන්ඩ් ප්‍රාන්තයේ කුලී මිල ගණන් දරා ගත නොහැකි තදාසන්න ප්‍රදේශ වනවා.

වික්ටෝරියා ප්‍රාන්තයේ Mornington West, Rosebud සහ Doncaster යන ප්‍රදේශ දැරිය නොහැකි මිල ගණන් සහිත ප්‍රදේශ අතර ඉහළින් සිටින බවයි වාර්තා වන්නේ.

මිල වැඩිවීම් තරමක් අඩු වී ඇති ප්‍රදේශවල පවා බොහෝ කුලී නිවැසියන් ගැටලුවලට මුහුණ දෙමින් සිටින අතර ඔවුන් කුලී ගෙවීම සඳහා තම ආදායමෙන් සියයට 30කට වඩා වැඩි ප්‍රමාණයක් වෙන් කරන බව සඳහන්.