ඩොලර් මිලියන 15ක ලොතරැයි ජයක් ලැබුණත් රැකියාවට ගිය මෙල්බන් සේවකයා

Oz Lotto ලොතරැයි දිනුම් ඇදීමෙන් ඩොලර් මිලියන 15ක මුදලක් ජයග්‍රහණය කළ මෙල්බන් පදිංචිකරු ලොතරැයි නිලධාරීන් හමුවී ජයග්‍රහණය තහවුරු කරගෙන තිබෙනවා.

පසුගිය අඟහරුවාදා සිදු කළ දිනුම් ඇදීමේදී Oz Lotto ලොතරැයියේ division one හි ජයග්‍රහණ දෙක හිමි ලොතරයිවලින් එකක් මෙල්බන්හි අලෙවිසලකින් මිලදී ගෙන තිබූ අතර අනෙක් ලොතරැයිය OzLotteries.com මගින් නිව් සවුත් වේල්ස් ප්‍රාන්තයේ පුද්ගලයෙකු මිලදීගෙන ඇති බවයි ලොතරැයි බලධාරීන් සඳහන් කළේ.

ඊයේ උදෑසන ටිකට්පත පරීක්ෂා කිරීමෙන් පසු ඩොලර් මිලියන 15ක ත්‍යාගය තමාට හිමි වූ බව වටහා ගැනුන ද මෙම ජයග්‍රාහකයා තීරණය කර ඇත්තේ සුපුරුදු පරිදි රැකියාවට යාමටයි.

ග්ලෙන් වේවර්ලි (Glen Waverley) ප්‍රදේශයේ පදිංචිකරුවෙක් වන ඔහු ඊයේ උදෑසනම තම ටිකට් පරීක්ෂා කර බලා ජයග්‍රාහකයෙකු බව දැනගත්ත ද සාමාන්‍ය පරිදි රැකියාවට යාමට තීරණය කර තිබුණා.

ලොතරැයි නිලධාරීන් අමතමින් මෙම පුද්ගලයා සඳහන් කර ඇත්තේ මෙම ජයග්‍රහණය පිළිබඳ තමාට විශ්වාස කළ නොහැකි වූ බවයි.

ජයග්‍රාහී මුදලින් යුරෝපයේ රටක පදිංචියට යාමට අදහස් කරන බව ද ඔහු සඳහන් කර තිබෙනවා.

මෙල්බන් Cecil Street හි සෙරාග්ලියෝ ලොටෝ (Seraglio Lotto) වෙතින් මෙම සුපිරි ත්‍යාගය හිමි ලොතරැයිය මිලදී ගෙන තිබූ අතර වෙළඳසැල් හිමිකාරිය ද පැවසුවේ තම අලෙවිසැල ඩොලර් මිලියන 15ක ජයග්‍රාහී ටිකට් පතක් විකුණා ඇති බව විශ්වාස කළ නොහැකි බවයි.