ඔස්ට්‍රේලියාවේ තරුණයන්ට උපකාර අවශ්‍ය බව නව සමීක්ෂණයකින් හෙළිවෙයි

ඔස්ට්‍රේලියාවේ තරුණ තරුණියන් බොහෝ පිරිසකට උපකාර අවශ්‍ය බව නව පර්යේෂණයකින් හෙළි වී තිබෙනවා.

Health and Wellbeing Queensland විසින් වයස අවුරුදු 14 ත් 24 ත් අතර වයස් කාණ්ඩයේ තරුණ කණ්ඩායම් යොදා ගනිමිනුයි මෙම පර්යේෂණය සිදු කර ඇත්තේ.

සමීක්ෂණයට ප්‍රතිචාර දැක්වූ සෑම 10 දෙනෙකුගෙන් නව දෙනෙකුම කියා සිටියේ පසුගිය වසර තුළ තම සෞඛ්‍යය තත්වය පිරිහී ගොස් ඇති බවයි.

ඔවුන්ගෙන් සියයට 59ක් කිසිදු හේතුවක් නොමැතිව වෙහෙසට පත්වන බව සෑම කාර්යයකටම අමතර උත්සාහයක් දැරීමට සිදුවී ඇති බවයි ප්‍රකාශ කර ඇත්තේ.

මෙම තරුණ කණ්ඩායම් අතරින් තවත් පිරිසක් ඔවුන් ආතතියට හා කනස්සල්ලට පත් වීම, ශරීර ශක්තියක් ප්‍රමාණවත් නොවීම මෙන්ම බර වැඩිවීම වැනි තත්වයන් ද වාර්තා කර තිබෙනවා.

ක්වීන්ස්ලන්ඩ් ප්‍රාන්තයේ සෞඛ්‍ය සහ යහපැවැත්ම පිළිබඳ ආයතනයේ (Health and Wellbeing Queensland) නියෝජ්‍ය ප්‍රධාන විධායක නිලධාරී Gemma Hodgetts පැවසුවේ සොයා ගත් මෙම කරුණු විශ්වාස කළ නොහැකි තරම් තත්වයක පවතින බවයි.

වඩාත් ජවසම්පන්න අනාගතය සම්බන්ධයෙන් බලාපොරොත්තු සහිත පරම්පරාව අරගලයක නිරත වන බවයි ඇය ප්‍රකාශ කළේ.

මානසික සෞඛ්‍යය පිරිහීම මගින් ආතතිය වැඩි වීම සහ දුර්වල ආහාර රටාවන් ද නිර්මාණය වන බව පර්යේෂණය මගින් පෙන්වා දී තිබෙනවා.

මානසික ආබාධවලින් සියයට 75ක් පමණ වයස අවුරුදු 24 ට පෙර මතු වී ඇති අතර සෑම ක්වීන්ස්ලන්ඩ් ප්‍රාන්ත වැසියන් දෙදෙනෙකුගෙන් එක් අයෙකු තම ජීවිත කාලය තුළ මානසික රෝගවලට මුහුණ දෙන බව පර්යේෂණයෙන් හෙළි වී ඇති බව සඳහන්.

මේ හේතුවෙන් ක්වීන්ස්ලන්ඩ් ප්‍රාන්තයේ පුද්ගලයන්ගේ සාමූහික මානසික සෞඛ්‍ය සහ යහපැවැත්ම සඳහා සහාය වීමට ක්‍රියා කළ යුතු බවයි Gemma Hodgetts පෙන්වා දුන්නේ.

සෞඛ්‍යය සහ යහපැවැත්ම සම්බන්ධයෙන් හැසිරීම්, ආකල්ප අවබෝධ කර ගැනීම සඳහා මෙම සමීක්ෂණයට වයස අවුරුදු 14 සිට 25 දක්වා පුද්ගලයින් 1424 දෙනෙකු සම්බන්ධ කරගෙන තිබුණා.