ඔස්ට්රේලියාවේ රියදුරු බලපත්රය ලබා ගැනීමට වඩාත්ම මිල අධික ප්රාන්ත සහ ප්රදේශ සම්බන්ධයෙන් නව අනාවරණයක් සිදු කර තිබෙනවා.
එම සමීක්ෂණ වාර්තාවෙන් පෙන්වා දෙන්නේ ඔස්ට්රේලියාවේ ප්රාන්තයෙන් ප්රාන්තයට මාර්ග නීති වෙනස් වන ආකාරයෙන්ම රියදුරු බලපත්රයක් ලබා ගැනීමේ වියදම ද වෙනස් වන බවයි.
රියදුරු බලපත්ර සඳහා අය කෙරෙන මුදල් සහ එහි ක්රියාවලියට ප්රමිතියක් හඳුන්වා දීමේ අරමුණින් පනතක් ගෙන ආව ද එහි නීති මෙතෙක් ක්රියාත්මක නොවන බවට ද චෝදනා එල්ල වනවා.
රියදුරු බලපත්රයක් ලබා ගැනීමට ඇති ලාභම ප්රාන්තය මිල අධික ප්රාන්තයට වඩා 10 ගුණයකින් පමණ ලාභදායී බවයි EzLicence හි දත්තවල දැක්වෙන්නේ.
මේ අනුව රිය ධාවනය සම්බන්ධයෙන් ඉගෙන ගැනීමට සහ රියදුරු බලපත්රය ලබා ගැනීමට ඉහළම වියදමක් දැරීමට සිදු වන්නේ දකුණු ඕස්ට්රේලියාවේදී යි.
ප්රාන්ත රජය විසින් හඳුන්වා දුන් නීති සම්පාදනය මගින් දකුණු ඔස්ට්රේලියාවේ රිය ධාවනය පුහුණු වන්නන් ඔවුන්ගේ ප්රායෝගික රිය පැදවීමේ පරීක්ෂණය සඳහා ඩොලර් 240ක ගාස්තුවක් ගෙවිය යුතුයි.
කෙසේවෙතත් දකුණු ඔස්ට්රේලියාවේ රියදුරු බලපත්රය, අධ්යයන සහ පරීක්ෂණ ආශ්රිත සම්පුර්ණ පිරිවැය වෙනුවෙන් ඩොලර් 1257ක් ගෙවීමට සිදුවන බවයි සඳහන් වන්නේ.
රියදුරු බලපත්ර සඳහා වැඩිම මුදලක් ගෙවිය යුතු ප්රාන්ත අතරින් දෙවන ස්ථානයේ පසුවන්නේ ක්වීන්ස්ලන්ඩ් ප්රාන්තයයි.
ක්වීන්ස්ලන්ඩ් හි රියදුරු බලපත්රය සඳහා වැය වන සම්පුර්ණ මුදල ඩොලර් 925ක්.
තුන්වන තැනට පත්ව සිටින නිව් සවුත්වේල්ස් ප්රාන්තයේ රියදුරු බලපත්රයක් ලබා ගැනීමටඩොලර් 915ක මුදලක් වැය වනවා.
ඔස්ට්රේලියාවේ කැන්බරා අග නගර කලාපයේ රියදුරන්ට තම බලපත්රය ලබා ගැනීම වෙනුවෙන් ඩොලර් 853ක් ගෙවීමට සිදුවන බව සඳහන්.
බටහිර ඕස්ට්රේලියාව පස්වන තැනට පත්ව ඇති අතර රියදුරු බලපත්ර ලබා ගැනීමට එහි පුරවැසියන්ට ඩොලර් 788ක් ගෙවීමට සිදු වනවා.
ටස්මේනියා ප්රාන්තයේ රියදුරන්ට ඔවුන්ගේ බලපත්රය ලබා ගැනීමට ඩොලර් 663ක් වැය වන අතර එම ප්රාන්තය පත්වී ඇත්තේ 6 වන ස්ථානයටයි.
වික්ටෝරියා ප්රාන්තය 7 වන ස්ථානයට පැමිණ ඇති අතර රිය පැදවීමේ පුහුණුව ආරම්භයේ සිට බලපත්රය ලබා ගැනීම දක්වා ප්රාන්තයේ රියදුරන්ට ඩොලර් 569ක් වැය වන බව සඳහන්.
කෙසේවෙතත් එය අනෙකුත් ප්රාන්ත හා සැසඳීමේ දී ලාභදායී බවයි EzLicence හි දත්ත පෙන්වා දෙන්නේ.
ඔස්ට්රේලියාවේ රියදුරු බලපත්රයක් ලබා ගැනීමට අඩුම මුදලක් වැය වන ප්රදේශය වන්නේ NT කලාපයයි.
එහි රියදුරු බලපත්රයක් ලබා ගැනීම සඳහා වැය වන මුදල ඩොලර් 148 ක්.
