වකුගඩු රෝගීන් සඳහා ලබාදෙන ඩයලිසිස් (dialysis) ප්රතිකාරය සිඩ්නි අවට රෝහල් රැසක සීමා කිරීමට සිදුවී ඇතැයි වෛද්යවරු පවසනවා.
ජීවිතාරක්ෂක ප්රතිකාර ක්රමයක් වන මෙය සීමා කිරීම අර්බුදයක් විය හැකි බවටයි සිඩ්නි වෛද්යවරු අනතුරු අඟවා ඇත්තේ.
සෞඛ්ය කලාප තුනක සේවය කරන වෛද්යවරු පවසන්නේ පසුගිය මැයි මාසය අවසානයේ සිට ඩයලිසිස් රෝගීන්ගේ සම්මත ප්රතිකාර ක්රමය සතියකට තුන් වතාවක් වෙනුවට සතියකට දෙවතාවක් දක්වා අඩු කර ඇති බවයි.
වසර ගණනාවක් පුරා සෞඛ්ය සේවයේ අවශ්යතා සඳහා අඩු ආයෝජනයක් කිරීම හේතුවෙන් වකුගඩු අකර්මණ්ය වූ රෝගීන් සඳහා ලබාදෙන ජීවිතාරක්ෂක ප්රතිකාර ක්රමය ද සලාක ක්රමයට ලබාදීමට සිදුවී ඇති බව වෛද්ය විශේෂඥයින් පෙන්වා දෙනවා.
නේපීන් රෝහලේ (Nepean Hospital) වෛද්ය කාර්ය මණ්ඩල සභාපති වෛද්ය ජේම්ස් මැලෝස් ප්රකාශ කළේ වකුගඩු රෝගීන්ට ප්රමාණවත් ප්රතිකාර ලබා දීමට නොහැකි අතර එමගින් රෝගාබාධ වැඩිවීම සහ මරණ සිදුවීම ඉහළ යන බවයි.
මේ හේතුවෙන් වකුගඩු සහ ඩයලිසිස් සේවාවන් කෙරෙහි කඩිනම් අවධානයක් යොමු කරන ලෙස සිඩ්නි අවට සෞඛ්ය කලාපවල වෛද්යවරුන් සහ විශේෂඥයින් 45ක් පමණ නිව් සවුත්වේල්ස් සෞඛ්ය අංශයෙන් ඉල්ලා තිබෙනවා.
මේ වන විට සංවර්ධනය වෙමින් පවතින ලෝකයේ රටවල පවතින ආකාරයේ hemodialysis ප්රතිකාර ලබා දෙන අතර මේ වන විට ප්රාන්තයේ වකුගඩු සම්බන්ධ ප්රතිකාර සේවය තීරණාත්මක ස්ථානයකට පැමිණ ඇති බවයි ඔවුන් ප්රකාශ කර ඇත්තේ.
මෙම තත්වය ඉතා බැරෑරුම් ලෙස සලකන අතර වකුගඩු සේවා සඳහා අමතර මුදල් ආයෝජනය කිරීමට සැලකිය යුතු පියවර ගෙන ඇති බව සෞඛ්ය නියෝජ්ය ලේකම් ඩෙබොරා විල්කොක්ස් සඳහන් කළා.
