වික්ටෝරියා ප්රාන්තයේ පවුල් සෞඛ්ය සේවා නිලධාරිනියන්ට (Midwives) ගැබිණි කාන්තාවන් සඳහා නියම කළ හැකි ඖෂධ සම්බන්ධයෙන් විශාල වෙනසක් සිදු කර තිබෙනවා.
වික්ටෝරියා ප්රාන්තයේ සෞඛ්ය ඇමතිනී මේරි ඈන් තෝමස් සඳහන් කළේ අද සිට ක්රියාත්මක වන පරිදි මෙම තීරණය බලපැවැත්වෙන බවයි.
මේ අනුව ප්රාන්තයේ පවුල් සෞඛ්ය සේවා නිලධාරිනියන්ට වෛද්ය අවශ්යතා මත සිදු කෙරෙන ගබ්සාවන් සඳහා ඖෂධ වට්ටෝරු ලබා දීමට අවසර හිමි වනු ඇති.
වසර තුනක සායනික පුහුණුවක් සහිත, රජයේ අනුමත පවුල් සෞඛ්ය සේවා නිලධාරිනියන්ට රෝගීන් සඳහා වේදනානාශක ඖෂධ, නිර්වින්දන සහ ගබ්සා කිරීමේ ඖෂධ නියම කිරීමට අවසර ලබාදීමට රජය තීරණය කර තිබෙනවා.
බලයලත් සෞඛ්ය සේවා නිලධාරිනියන්ට පූර්ණ කාලීන සායනික පුහුණුව පිළිබඳ අවම වශයෙන් වසර තුනක පළපුරුද්දක් තිබිය යුතු අතර ඖෂධ නිර්දේශ කිරීම සඳහා උපාධි අධ්යාපනය සහ පුහුණුව ලබා තිබිය යුතු බව ද සඳහන්.
සෞඛ්ය ඇමතිවරිය පැවසුවේ මෙය වික්ටෝරියා ප්රාන්තයේ පවුල් සෞඛ්ය සේවා නිලධාරිනියන්ගේ වෙහෙස සහ ඔවුන්ගේ කුසලතා හඳුනා ගැනීමේ වැදගත් කටයුත්තක් බවයි.
ගබ්සා කිරීම් වැනි කටයුතු සඳහා පහසුකම් ලබා ගැනීම වෙනුවෙන් බොහෝ දුරක් ගමන් කිරීමට අවශ්ය කලාපීය ග්රාමීය ප්රදේශවල සිටින වික්ටෝරියානු ජනතාවට මෙය වැදගත් වනු ඇති බවයි ඇය පෙන්වා දුන්නේ.
ඕස්ට්රේලියානු හෙද සහ පවුල් සෞඛ්ය සේවා නිලධාරිනියන්ගේ සම්මේලනයේ මාතෘ සේවා නිලධාරිනි නිකොල් ඇලන් පැවසුවේ මෙම තීරණයත් සමග පවුල් සෞඛ්ය සේවා නිලධාරිනියන්ට ප්රසූති වේදනා නාශක ඖෂධ, විවිධ ආසාදන සඳහා ප්රතිජීවක සහ මව්කිරි දීමට අවශ්ය ඖෂධ නියම කිරීමට ද ඉඩ සැලසෙන බවයි.
