වික්ටෝරියා ප්‍රාන්ත ජනතාවට යළි අනතුරු ඇඟවීමක්

අද රාත්‍රියේ සිට යළිත් වික්ටෝරියා ප්‍රාන්තයේ නැගෙනහිර සහ ගිනිකොන දිග ප්‍රදේශවලට නැවත දැඩි සුළං තත්වයක් හට ගන්නා බව කාලගුණ විද්‍යා කාර්යාංශය අනතුරු අඟවා තිබෙනවා.

නිව් සවුත් වේල්ස් සහ වික්ටෝරියා ප්‍රාන්තවලට බලපෑ මෙම අයහපත් කාලගුණයෙන් පීඩාවට පත් ජනතාවට අද දහවල් කාලයේ යම් තරමක සහනයක් පවතිනු ඇති බවයි දැනුම් දී ඇත්තේ.

අද උදෑසන සිඩ්නි නගරයට දකුණින් පිහිටි Illawarra ප්‍රදේශය ඇතුළු නිව් සවුත්වේල්ස් ප්‍රාන්තයේ විශාල ප්‍රදේශයකට මෙන්ම වික්ටෝරියා ප්‍රාන්තයේ ප්‍රදේශ රැසකට කාලගුණ අනතුරු ඇඟවීමක් නිකුත් කරනු ලැබුවා.

කාලගුණ විද්‍යා කාර්යාංශය පවසන්නේ වික්ටෝරියා ප්‍රාන්තයේ එක් පුද්ගල මරණයක් සහ නිවාස 6000කට විදුලිය විසන්ධි කළ දැඩි සුළං තත්වය අද රාත්‍රියේ සිට ප්‍රාන්තයේ නැගෙනහිර සහ ගිනිකොන දිග ප්‍රදේශවල නැවත ආරම්භ වන බවයි.

සාමාන්‍යයෙන් අද සවස සිට ප්‍රාන්ත දෙකෙහිම පැයට කිලෝමීටර 60 සිට 70 දක්වා තද සුළං තත්වයක් පවතින අතර කඳුකර ප්‍රදේශ ආශ්‍රිතව පැයට කිලෝමීටර 100 ඉක්මවිය හැකි දැඩි සුළං ඇති වනු ඇති බවටයි කාර්යාංශය දැනුම් දෙන්නේ.

වික්ටෝරියා ප්‍රාන්තයේ පෝට් ෆිලිප් සහ ගිප්ස්ලන්ඩ් ප්‍රදේශය ඇතුළු වෙරළ තීරයේ විශාල ප්‍රදේශයකට සුළි කුණාටු අනතුරු ඇඟවීමක් ද නිකුත් කර තිබෙනවා.

බටහිර ඔස්ට්‍රේලියාවේ නිරිතදිග ප්‍රදේශවලට ද අද මෙම සුළං තත්වයෙන් බලපෑම් එල්ලවිය හැකි අතර ඇල්බනි, බන්බරි, එස්පෙරන්ස් සහ මැන්ඩූරා ප්‍රදේශවලට පැයට කිලෝමීටර් 90 සිට 100 දක්වා තද සුළං ඇති විය හැකි බවටයි දැනුම්දී ඇත්තේ.