දැඩි සුළඟත් සමග වික්ටෝරියා මාර්ගයක අවාසනාවන්ත සිදුවීමක්

වික්ටෝරියා ප්‍රාන්තයේ Gellibrand ප්‍රදේශයේදී මෝටර් රථයක් මතට ගසක් කඩා වැටීමෙන් පුගලයෙකු මියගොස් තවත් කාන්තාවක් තුවාල ලබා තිබෙනවා.

ඔවුන් ගමන් කළ මෝටර් රථයට මෙම ගස කඩා වැටී ඇති අතර සුන්බුන්වලින් බේරා ගැනීමට පෙර මෙම යුවළ පැයකට වැඩි කාලයක් රථයේ සිරවී සිටි බවයි සඳහන් වන්නේ.

මෙල්බර්න් නගරයට කිලෝමීටර් 175ක් පමණ දුරකින් පිහිටි ජෙලිබ්‍රෑන්ඩ් ප්‍රදේශයේදී මෙම අනතුර වාර්තා වී ඇත්තේ අද පැවති දැඩි සුළං තත්වයත් සමගයි.

අද දහවල් 1.30ට පමණ බෙරීස් පාර (Berrys Rd) අසල ප්‍රධාන පාරට ගස කඩා වැටීමෙන් පසු ඔවුන් දෙදෙනාම පැයකට වැඩි කාලයක් මෝටර් රථය තුළ සිරවී සිටි අතර රියදුරා එම ස්ථානයේදීම මිය ගොස් ඇති බවයි වාර්තා වන්නේ.

ඔවුන් දෙදෙනාගේ අනන්‍යතාව මෙතෙක් හඳුනාගෙන නොමැති බව වික්ටෝරියා පොලිසියප්‍රකාශ කළ අතර මේ සම්බන්ධයෙන් පරීක්ෂණ ක්‍රියාත්මකයි.

වික්ටෝරියා ප්‍රාන්තයේ බොහෝ ප්‍රදේශවලට බලපෑම් කර ඇති දැඩි සුළං තත්වය හමුවේ ගස් කඩා වැටීමෙන් ගොඩනැගිලි රැසකට හානි සිදු වී ඇති අතර නිවාස සහ ව්‍යාපාරික ස්ථානය 6000කට ආසන්න ප්‍රමාණයකට විදුලිය විසන්ධි වී තිබෙනවා.

අද උදෑසන කාලගුණ විද්‍යා කාර්යාංශය නිවේදනය කර තිබුණේ ඉදිරි පැය කිහිපය තුළ ප්‍රාන්තයේ සෙසු ප්‍රදේශවල ද දැඩි සුළං තත්වයෙන් බලපෑම් ඇති විය හැකි බවයි.

අද රාත්‍රියේදී වික්ටෝරියා ප්‍රාන්තයේ වෙරළබඩ ප්‍රදේශවල සුළගේ වේගය පැයට කිලෝමීටර 110 දක්වා ඉහළ යා හැකි බව ද අනතුරු අඟවා තිබෙනවා.

එමන්ම මාර්ගවල කඩාවැටුණු ගස් සහ සුන්බුන් පිළිබඳවද අවධානයෙන් සිටින ලෙසටයි රියදුරන්ගෙන් ඉල්ලා ඇත්තේ.