නිව් සවුත් වේල්ස් ප්රාන්ත රියදුරන් විසින් ඩොලර් මිලියන 80කට ආසන්න වටිනාකමකින් යුත් Toll rebates මෙතෙක් ඉල්ලුම් කර නොමැති බවට වාර්තා වනවා.
ඇතැම් රියදුරන්ට ඩොලර් දහස් ගණනක මුදලක් ආපසු ලබා ගැනීමට සුදුසුකම් ලබා ඇති බවයි සඳහන් වන්නේ.
ප්රාන්ත රජයේ නව දත්තවලට අනුව, සිඩ්නි නගර කලාපයේ සිටින මෝටර් රථ රියදුරන් 350,000ක් පමණ ඔවුන්ගේ මාර්ග ගාස්තු වියදම් ආපසු ලබා ගත හැකි බව දැනුම් දී තිබෙනවා.
මෙම වසර ආරම්භයේදී රජය විසින් ගාස්තු සීමා කිරීමේ ක්රමයක් හඳුන්වා දුන් අතර, මාර්ග භාවිතා කරන රියදුරන්ට ගෙවිය යුතු උපරිම මුදල ඩොලර් 60 දක්වා අඩු කරනු ලැබුවා.
මේ වන විට එමගින් සිඩ්නි නගරයේ මෝටර් රථ හිමියන්ට ඩොලර් මිලියන 39ක පමණ මුදලක් ආපසු ලබා දී තිබෙනවා.
රජයේ සංඛ්යාලේඛන පෙන්වා දෙන්නේ Auburn හි ඇතැම් රියදුරන්ට ඩොලර් 554ක පමණ ගාස්තු සහනයක් ලැබී ඇති බවයි.
ජනවාරි පළමු වනදා සිට ප්රාන්තයේ මාර්ග භාවිතා කිරීමේදී අය කළ ගාස්තුවලින් මෝටර් රථ රියදුරන්ට නැවත ලබාදීමට ඩොලර් මිලියන 79ක් ඉතිරිව ඇති බවයි දැනුම් දෙන්නේ.
සතියකට ඩොලර් 60ට වඩා සහ ඩොලර් 400ට වඩා අඩුවෙන් වියදම් කරන රියදුරන්ට මෙම යෝජනා ක්රමය හරහා ඔවුන්ගේ ගාස්තු ආපසු ලබා ගැනීමට හැකියි.
ඩොලර් 400 ට වැඩි ගාස්තු සඳහා අර්ධ වශයෙන් ආපසු ලබා ගත හැකි බවයි සඳහන් වන්නේ.
මෝටර් රථ හිමියන්ට එක් කුපන් පතක් හෝ බලපත්රයක් සඳහා සතියකට උපරිම වශයෙන් ඩොලර් 340ක් දක්වා ලබා ගැනීමට හැකියි.
බොහෝ විට ගාස්තු අය කරන මාර්ග භාවිතා කරන 6000කට වඩා වැඩි පිරිසක් මේ වසරේ සාමාන්යයෙන් ඩොලර් 4000ක් බැගින් සහන ලබා ගැනීමට නියමිත බව ද සඳහන්.
තම e-Tag ඔවුන්ගේ ගිණුමට සම්බන්ධ කර ඇති රියදුරන් සඳහා කාර්තුමය වශයෙන් හිමිකම් ඉදිරිපත් කළ හැකි අතර මෙම සියලු මාර්ග ගාස්තු වියදම් ඉල්ලා සිටීමට මෝටර් රථ හිමියන්ට ලබන 2025 වසරේ ජුනි 30 දක්වා කාලය පවතිනවා.
