ඔස්ට්‍රේලියාවේ උද්ධමනය පහළට

නිවාස සහ ආහාර මිල ගණන් තවදුරටත් ඉහළ යමින් තිබියදී උද්ධමනය සියයට 3.5 දක්වා අඩු වී තිබෙනවා.

ඔස්ට්‍රේලියානු සංඛ්‍යාලේඛන කාර්යාංශයේ (ABS) නව සංඛ්‍යාලේඛන පෙන්වා දෙන්නේ මෙම වසරේ ජුලි මාසයෙන් අවසන් වූ මාස 12ක කාලයක් තුළ මාසික උද්ධමන අනුපාතය සියයට 3.5 දක්වා අඩුවී ඇති බවයි.

ජූලි මාසයේ උද්ධමන අනුපාතය ජුනි මාසයේ පැවති සියයට 3.8 ට වඩා අඩු වීම ද විශේෂත්වයක්.

බලශක්ති වට්ටම් වැනි සහන මගින් විදුලි බිල අඩු කිරීම හමුවේ ජූලි මාසයේදී උද්ධමනය සියයට 3.5 දක්වා පහත වැටීමට හේතුව බව ආර්ථික විශේෂඥයින් පෙන්වා දෙනවා.

නිවාස මිල ගණන් සියයට 4 කින්, ආහාර සහ මධ්‍යසාර නොවන පාන වර්ග සියයට 3.8 කින්, මධ්‍යසාර සහ දුම්කොළ සියයට 7.2 කින් සහ ප්‍රවාහනය සියයට 3.4 කින් ඉහළ යාම වාර්ෂික වර්ධනයට බොහෝ දුරට හේතු වූ බව සඳහන්.

ඔස්ට්‍රේලියානු සංඛ්‍යාලේඛන කාර්යාංශයේ වැඩබලන සංඛ්‍යාලේඛන ප්‍රධානී Leigh Merrington සඳහන් කළේ පාරිභෝගික මිල දර්ශකය මත උද්ධමනය බොහෝ විට බලපානු ලබන්නේ ඉන්ධන, පළතුරු සහ එළවළු මෙන්ම සංචාර වැනි සේවා මත මිල වෙනස්වීම් මගින් බවයි.

ජූනි මාසයේදී සියයට 7.5කින් ඉහළ ගිය විදුලි ගාස්තු සියයට 5.1කින් පහත දැමීමට ෆෙඩරල් රජය ගත් පියවර හේතුවෙන් නිවාසවල මිල ගණන් වර්ධනය නොවීමට හේතු වූ බව ද සඳහන්.

එමෙන්ම පසුගිය ජූනි මාසය දක්වා ගත වූ මාස 12 තුළ සියයට 7.1ක පැවති නිවාස කුලී මිල ගණන් ද සියයට 6.9 දක්වා පහත වැටි තිබෙනවා.