මෙල්බන් Cranbourne East ප්රදේශයේ දී සිදු වූ වෙඩි තැබීමකින් 58 හැවිරිදි පුද්ගලයෙකු බරපතල තුවාල ලබා තිබෙනවා.
21 හැවිරිදි තම දියණියගේ මෝටර් රථය පසුපස හඹා ආ තවත් මෝටර් රථයක සිටි පුද්ගලයෙකු සමග සිදු වූ බහින් බස් වීමකදී මෙම පියාට වෙඩි වැදී ඇති බවයි සඳහන් වන්නේ.
මෙම තරුණිය අද අලුයම 12.25 ට පමණ Cranbourne East ප්රදේශයේ තම රථය පදවාගෙන යමින් සිටියදී නාඳුනන පුද්ගලයෙකු තමන් පසුපස හඹා එන බවට වටහා ගැනීම හේතුවෙන් ඇය ඒ පිළිබඳ පොලිසියට දැනුම් දී තිබෙනවා.
ඒ සමගින් සිද්ධිය පිළිබඳ පියා දැනුවත් කිරීමට ද ඇය කටයුතු කර ඇති අතර එහිදී ඔහු දියණියට ප්රකාශ කර ඇත්තේ නිවසට පැමිණෙන ලෙසටයි.
දියණිය නිවසට පැමිණෙන තෙක් අපේක්ෂාවෙන් සිටි මෙම පුද්ගලයා ඇයගේ මෝටර් රථය පසුපසින් පැමිණි රථයේ පුද්ගලයා සමග ඇති වූ බහින්බස් වීමකින් පසු එම රියදුරා මෙම පියාට දියණිය අසලදී ම වෙඩි තබා ඇති බවයි වාර්තා වන්නේ.
58 හැවිරිදි මෙම පියාගේ උදරයට වෙඩි වැදී ඇති අතර සැකකරු එම ස්ථානයෙන් පළා ගොස් තිබෙනවා.
හදිසි සේවා ගිලන් රථ මගින් ඔහු රෝහල් ගත කර ඇති අතර වෙඩි ප්රහාරයෙන් සිදු වූ තුවාල මගින් ජීවිත තර්ජනයක් නොමැති බවයි පැවසෙන්නේ.
මෙම වෙඩි තැබීම සැලසුම් සහගත එකක් ලෙසට පොලිසිය විශ්වාස නොකරන අතර මෙම දෙපාර්ශවය එකිනෙකා දැන නොසිටි බවයි සඳහන් වන්නේ.
Cranbourne East ප්රදේශයේ ඊයේ තවත් මෝටර් රථ කොල්ලකෑමක් සහ පිහි ඇනුමක් වාර්තා වී ඇති අතර මෙම සිදුවීම් දෙක අතර සම්බන්ධයක් නොමැති බව පොලිසිය තහවුරු කර තිබෙනවා.
